آئی سی سی مینز ٹی ٹوئنٹی ورلڈکپ کے حوالے سے آئی سی سی کی جانب سے بنگلادیش کی درخواست مسترد کرنے کی بھارتی خبریں بے بنیاد، منگھڑت اور جھوٹ کا پلندہ نکلیں، بنگلادیش کرکٹ بورڈ کی جانب سے جاری پریس ریلیز میں کہا گیا ہے کہ وینیوز بھارت سے منتقل کرنے سے انکار کی خبروں میں کوئی صداقت نہیں۔
آئی سی سی نے ورلڈکپ میں بنگلادیشی ٹیم کی مکمل اور بلا تعطل شرکت کو یقینی بنانے کے اپنے عزم کا اعادہ کرتے ہوئے خدشات دور کرنے کیلئے ساتھ ملکر کام کرنے کی رضامندی ظاہر کی ہے، آئی سی سی نے بنگلادیشی کرکٹ بورڈ کو یہ یقین بھی دلایا ہے کہ ایونٹ کیلئے تفصیلی حفاظتی منصوبہ بندی پر بھی پر غور کیا جائیگا، بنگلادیشی کرکٹ بورڈ نے آئی سی سی کی جانب سے الٹی میٹم جاری کرنے کی خبروں کی واضح طور پر تردید بھی کی ہے اور ایسی بے بنیاد خبروں کا نوٹس لیتے ہوئے واضح کیا ہے کہ اس طرح کے دعوے مکمل طور پر جھوٹے اور بے بنیاد ہیں، ایسی جھوٹی خبریں آئی سی سی سے موصول ہونیوالی بات چیت کی نوعیت یا مواد کی عکاس نہیں ہیں۔
بنگلادیشی کرکٹ بورڈ کا کہنا ہے کہ وہ آئی سی سی اور متعلقہ ایونٹ حکام کیساتھ تعاون پر مبنی اور پیشہ ورانہ انداز میں تعمیری مصروفیات جاری رکھے گا تاکہ ایک قابل عمل اور عملی حل تک پہنچ سکے۔
