وزیراعلی سندھ سید مراد علی شاہ نے کراچی کو دنیا کے بہترین شہروں میں شامل کرنے کیلئے 84 ارب روپے سے زائد پیکیج دینے کا اعلان کرتے ہوئے کہا ہے کہ ایف ڈبلیو او انجینئرز، محکمہ بلدیات اور کے ایم سی افسران کو مارچ 2026ء سے ترقیاتی کام شروع کرنے کا حکم دے دیا۔
بدھ کو فرنٹیئر ورکس آرگنائزیشن کے وفد نے ڈی جی میجر جنرل عبدالسمیع کی سربراہی میں وزیراعلی سندھ سے ملاقات کی۔
اس موقع پر وزیر بلدیات سید ناصر حسین شاہ، چیف سیکرٹری آصف حیدر شاہ، میئر کراچی مرتضی وہاب، پرنسپل سیکریٹری آغا واصف، کمشنر کراچی حسن نقوی اور سیکریٹری خزانہ فیاض جتوئی بھی موجود تھے۔
ملاقات میں گفتگو کرتے ہوئے وزیراعلی سندھ نے کہا کہ کراچی کی ترقی کا جامع منصوبہ نافذ کرنا چاہتے ہیں، کراچی کیلئے 84 ارب 79کروڑ 60لاکھ روپے کا پیکیج دینا چاہتا ہوں، شہر کیلئے 26ارب 20کروڑ روپے کی مزید رقم کی منظوری بھی دیدی گئی ہے۔ انہوں نے کہا کہ خواہش ہے ایف ڈبلیو او کیساتھ شراکت داری قائم کر کے ترقیاتی منصوبے شروع کئے جائیں۔ انہوں نے کہا کہ کراچی کی ترقی دنیا کے بہترین شہروں سے کم نہیں ہونی چاہئے، تمام میگا و اہم منصوبوں کی بہترین ڈیزائننگ کی جائے۔
انہوں نے کہا کہ ایم نائن جناح ایونیو تا شاہراہ فیصل تک سڑک کی تعمیر اہم منصوبوں میں شامل ہے، ملیر ہالٹ پرنٹنگ پریس سے شاہراہ فیصل تک دائیں جانب انڈر پاس کی تعمیر کا منصوبہ ہے، کیونکہ ملیر ہالٹ پر ٹریفک کا بڑا بوتل نیک موجود ہے جسے ختم کرنا ہوگا۔
انہوں نے کہا کہ ایئرپورٹ سے سٹار گیٹ کی جانب فلائی اوور کی تعمیر کیا جائے گا جس سے ایئرپورٹ تا شاہراہِ فیصل تک براہِ راست رسائی حاصل ہوگی۔
انہوں نے کہا کہ وائی جنکشن سے مچھلی چوک (ہاکس بے روڈ) کی تعمیر کی جائے گی، اسی طرح مسرور بیس تا ٹرک اسٹینڈ تک سڑک کی تعمیر بھی ساتھ ہوگی، یہ منصوبے کمرشل اور ہیوی ٹریفک کیلئے شامل ہیں۔ انہوں نے کہا کہ سہراب گوٹھ پر فلائی اوور کی تعمیر کا بھی منصوبہ ہے، یہ شہر کا گیٹ وے ہے، یہاں شدید ٹریفک دبائو رہتا ہے، فلائی اوور بننے سے ٹریفک کا دبائو ختم ہو جائے گا۔
انہوں نے کہا کہ مزید 7 منصوبے ایسے ہیں جن کیلئے میں 84.7 ارب روپے فراہم کر رہا ہوں، کراچی شہر کے مختلف علاقوں میں 443 اندرونی سڑکوں کی تعمیر کی جائے گی، ٹریفک مینجمنٹ کیلئے 9 منصوبے بنائے گئے ہیں اور کے ایم سی کی 26 سڑکوں کی تعمیر بھی کی جا رہی ہے۔
انہوں نے کہا کہ پارکس، سڑکوں اور فلائی اوورز میں بہتری کے کام جاری ہیں جبکہ شہر کے 9اہم منصوبوں کی تعمیر، 10مختلف علاقوں میں اہم سڑکوں کی تعمیر اور 7مختلف سڑکوں کی بیوٹیفکیشن کے منصوبے بھی شامل ہیں۔
اس موقع پر ایف ڈبلیو او کے انجینئرز، محکمہ بلدیات اور کے ایم سی کے اعلی افسران کو مشترکہ طور پر منصوبوں کی ڈیزائننگ کا کام فوری شروع کرنے کی ہدایت کی گئی۔
وزیراعلی نے کہا کہ ڈیزائن اور یوٹیلٹیز کی منتقلی سے متعلق مسائل فروری میں مکمل ،مارچ 2026 سے ترقیاتی کام شروع کیا جائے۔
