امریکی صدر ڈونلڈ ٹرمپ نے کہا ہے کہ اگر ایران نے اپنا جوہری پروگرام دوبارہ شروع کیا توفوری کاروائی کریں گے، ہم اس بار زیادہ دیر نہیں لگائیں گے، ہماری فوج برسوں ایران کے جوہری پروگرام کو پروان چڑھانے کی اجازت نہیں دے گی۔
ان خیالات کا اظہار انہوں نے امریکی بحریہ کی 250ویں سالگرہ کے موقع پر نورفولک نیول بیس میں خطاب کے دوران کیا۔
انہوں نے کہا کہ رواں سال 22 جون کو ایران کی جوہری تنصیبات پر B-2 بمبار طیاروں اور ٹوماہاک میزائلوں کے ذریعے حملہ کیا گیا ، ان طیاروں نے اپنے تمام اہداف انتہائی درستگی سے نشانہ بنائے، جبکہ ایک آبدوز سے 30 ٹوماہاک میزائل بھی داغے گئے تاکہ مشن کامیابی سے مکمل ہو۔
امریکی صدر نے بتایا کہ امریکی افواج نے اس نوعیت کے حملے کے لیے تقریبا 22 برس تک تربیت حاصل کی، مگر ایسا فیصلہ ماضی کی کسی حکومت نے نہیں کیا۔ انہوں نے کہا کہ ہم نے 22 سال انتظار کیا، مگر اب دوبارہ اتنا طویل انتظار نہیں کریں گے۔
