کراچی: ایئر وائس مارشل شہریار خان نے یوم دفاع کے موقع پر مظلوم کشمیریوں و فلسطینیوں کیساتھ اظہار یکجہتی کرتے ہوئے کہا ہے کہ پاکستان کا دفاع مضبوط ہاتھوں میں ہے، دشمن کو پیغام ہے ہماری امن پسندی کو کمزوری نہ سمجھا جائے،ملک کا دفاع ہماری اولین ترجیح ہے۔
تفصیلات کے مطابق کراچی میں یوم دفاع کے موقع پر گارڈز تبدیلی کی تقریب سے خطاب کرتے ہوئے ایئر وائس مارشل شہریار خان نے کہا ہے کہ مزارقائد پر گارڈز کی ذمہ داریاں سنبھالنا ایئر فورس کیلئے اعزاز ہے۔انہوں نے کہا کہ دشمن کو پیغام ہے ہماری امن پسندی کو ہماری کمزوری نہ سمجھا جائے۔
انہوں نے کہا کہ پاک فضائیہ کے دستوں نے دشمن کو ایک انچ بھی آگے نہ بڑھنے دیا، پاک فضائیہ 1965ء کے دوران قوم کی امیدوں پر پوری اتری، آپ کو یقین دلاتا ہوں کہ پاکستان کا دفاع مضبوط ہاتھوں میں ہے۔انہوں نے کہا کہ پاک فضائیہ کے اہلکاروں کو جدید ٹریننگ دی جا رہی ہے، پاکستان کا امن ہماری اولین ترجیح ہے۔
انہوں نے کہا کہ ہم مظلوم کشمیری اور فلسطینیوں کے ساتھ اظہار یکجہتی کرتے ہیں، پوری قوم شہداء کی بہادری کو قابل احترام سمجھتی ہے، ہم شہداء کے شکر گزار ہیں۔
