اسلام آباد: صدر آصف زرداری نے پاکستان اور عمان کے درمیان اقتصادی و تجارتی تعلقات کو مزید وسعت دینے کی ضرورت پر زور دیتے ہوئے کہا ہے کہ حکومتی اور نجی شعبے کے قریبی روابط سے معاشی اور تجارتی تعاون میں اضافہ ہو گا۔
جاری بیان کے مطابق بدھ کو صدر مملکت سے عمان کے سفیر فہد سلیمان خلف الخاروصی نے ملاقات کی جس میں تجارت، سرمایہ کاری اور توانائی کے شعبوں میں تعاون کے فروغ پر گفتگو ہوئی اور پاک عمان تاریخی اور برادرانہ تعلقات کو مزید فروغ دینے کے عزم کا اعادہ کیا گیا۔
صدر زرداری نے پاکستان کی سلامتی کونسل کی غیرمستقل رکنیت کیلئے عمان کی حمایت پر شکریہ ادا کرتے ہوئے کہا کہ پاکستان اور عمان کے درمیان برادرانہ تعلقات مشترکہ مذہب، ثقافت اور اقدار پر مبنی ہیں، آئی ٹی، تعمیرات، صحت، فوڈ سیکیورٹی اور توانائی کے شعبوں میں سرمایہ کاری کے وسیع امکانات ہیں۔
انہوں نے کہا کہ دونوں ممالک کے درمیان اقتصادی وتجارتی تعلقات کو مزید وسعت دینے کی ضرورت ہے، حکومتی اور نجی شعبے کے قریبی روابط سے معاشی اور تجارتی تعاون میں اضافہ ہو گا۔
