لاہور: وزیراعلی پنجاب مریم نواز نے گوجرانولہ اور فیصل آباد میں بھی ایس آر ٹی ٹرین جلد چلانے کا عندیہ دیتے ہوئے کہا ہے کہ الیکٹرک ٹرین سے ماحولیاتی آلودگی میں کمی، ٹریفک میں بہتری آئے گی، پنجاب کے عوام کے لئے اب ہر روز خوشی کی خبر منتظر ہوتی ہے، ایس آر ٹی چلنے سے لاہور کی خوبصورتی دوبالا ہوگی۔
ذرائع کے مطابق بدھ کو مریم نواز نے پاکستان کی پہلی اربن الیکٹرک ٹرین ”سپر اٹانومس ریپڈ ٹرانزٹ”میںعلی ٹائون سے مسلم ٹائون تک تجرباتی سفر کیا۔وزیراعلی نے روڈ ٹیسٹ خود مانیٹر کیااورعام ٹریفک کے درمیان ایس آر ٹی کی رننگ چیک کی۔
اس موقع پر مریم نواز نے آر ٹی کا معائنہ اور موجود سہولتوں کا بھی جائزہ لیا۔رائے ونڈ روڈ اور کینال روڈ پر عوام ایس آر ٹی کو دیکھ کر خوشی کا اظہار کرتے رہے۔وزیر ٹرانسپورٹ بلال اکبر نے بریفنگ دیتے ہوئے وزیراعلی کو بتایا کہ سپر اٹانومس ریپڈ ٹرانزٹ ترکی، چین، ابوظہبی اور دیگر ممالک میں کامیابی سے چلائی جا رہی ہے، الیکٹرک ٹرین میں تین بوگیاں لگائی گئی ہیں جبکہ چار کی گنجائش ہے۔
وزیراعلی کو بتایا گیا کہ نورنکو انٹرنیشنل کی جدید ترین ایس آر ٹی میں 320مسافروں کی گنجائش ہے،پہلی مکمل ای ٹرین ایک دفعہ چارج کے بعد 40کلومیٹر سفر طے کر سکتی ہے،سپر اٹانومس ریپڈ ٹرانزٹ میں ایئر کنڈیشنڈ اور دیگر سہولیات بھی میسر ہیں۔
اس موقع پر وزیراعلی نے کہا کہ سپر اٹانومس ریپڈ ٹرانزٹ سے ماحولیاتی آلودگی میں کمی ،ٹریفک میں بہتری آئے گی، پنجاب کے عوام کیلئے اب ہر روز خوشی کی خبر منتظر ہوتی ہے، ایس آر ٹی چلنے سے لاہور کی خوبصورتی دوبالا ہوگی۔ انہوں نے کہا کہ گوجرانوالہ اور فیصل آباد میں بھی ایس آر ٹی کی خوشخبری جلد آئے گی۔
