کراچی: سپریم کورٹ نے پی آئی اے میں جعلی ڈگری پر ملازمت برطرفی کیخلاف سندھ ہائیکورٹ کا حکم امتناع ختم کرتے ہوئے وفاق کی اپیل منظور کرلی۔
بدھ کو سپریم کورٹ کراچی رجسٹری میں چیف جسٹس یحییٰ آفریدی کی سربراہی میں جسٹس محمد شفیع اور جسٹس اشتیاق ابراہیم پر مشتمل 3 رکنی بینچ نے پی آئی اے میں جعلی ڈگری پر ملازمت برطرفی معاملے پر حکم امتناع کیخلاف وفاقی حکومت کی اپیل پر سماعت کی۔دوران سماعت ایڈیشنل اٹارنی جنرل محسن شاہوانی نے موقف اپنایا کہ ندیم لودھی جعلی ڈگری پر ایسوسی ایٹ انجینئر بھرتی ہوا تھا، ڈگری جعلی ثابت ہونے پر پی آئی اے نے شوکاز نوٹس جاری کر کے ملازمت سے برطرف کر دیا تھا تاہم ندیم لودھی نے 2015ء میں ہائی کورٹ سے حکم امتناع حاصل کیا اور اس دوران ترقی پا کر آفیسر گریڈ کے گروپ 6تک پہنچ گئے تھے۔
عدالت نے پی آئی اے کو محکمہ جاتی کارروائی جاری رکھنے کی ہدایت کرتے ہوئے ریمارکس دیئے کہا کہ 10برس سے آپ اسٹے آرڈر پر چل رہے ہیں، ایسا نہیں ہوسکتا، ہم حکم امتناع واپس لے رہے ہیں، آپ اپنے کیس کی تیاری کریں۔
بعد ازاں عدالت نے وفاق کی اپیل منظور کرتے ہوئے سندھ ہائیکورٹ کا جاری حکم امتناع ختم کردیا۔
