بین الاقوامی موبائل کانگریس میں چینی کمپنیوں کی دھوم، متعدد ایوارڈز اپنے نام کر لئے

بارسلونا، سپین (شِنہوا) بارسلونا میں منعقدہ موبائل ورلڈ کانگریس (ایم ڈبلیو سی) 2026 میں چینی کمپنیاں مرکز نگاہ بن کر ابھریں جنہوں نے متعدد گلوبل موبائل ایوارڈز (گلومو ایوارڈز) اپنے نام کئے اور مصنوعی ذہانت (اے آئی)، فائیو جی ایڈوانسڈ اور سیٹلائٹ کمیونیکیشنز میں اپنی جدید اختراعات پیش کیں۔

ہواوے  کی یو ڈبلیو بی اے اے یو سیریز کی بیس سٹیشن مصنوعات نے بہترین موبائل نیٹ ورک انفراسٹرکچر کا ایوارڈ جیتا جبکہ چائنہ موبائل اور ہواوے کو ان کے اے آئی پلس نیٹ ورک آپریشنز پراجیکٹ کے لئے بہترین اے آئی پاورڈ نیٹ ورک سلوشن کا ایوارڈ دیا گیا۔ اس کے علاوہ چائنہ ٹیلی کام اور ہواوے کو سمارٹ فون سے براہ راست جی ای او سیٹلائٹ کنیکٹیویٹی ٹیکنالوجی پر بہترین این ٹی این سلوشن ایوارڈ سے نوازا گیا۔

سپین کے شہر بارسلونا میں موبائل ورلڈ کانگریس 2026 کے دوران لوگ چائنہ ٹیلی کام کے بوتھ کا دورہ کر رہے ہیں۔(شِنہوا)

چینی کمپنیوں کو صنعتی استعمال کے شعبوں میں بھی عالمی سطح پر تسلیم کیا گیا۔ چائنہ موبائل، ہواوے اور آنٹ گروپ  کے ایک مشترکہ ڈیجیٹل ہیلتھ اسسٹنٹ منصوبے نے مربوط صحت اور بہبود کے لئے بہترین موبائل جدت اور رسائی و شمولیت کے لئے موبائل کے بہترین استعمال کے دونوں ایوارڈز حاصل کئے۔ چائنہ ٹیلی کام، زیڈ ٹی ای، ایجی بوٹ اور ڈرائیڈ اپ نے اپنے ایزی آن فائیو جی- اے- روبوٹ نیٹ پراجیکٹ پر بہترین پرائیویٹ نیٹ ورک سلوشن کا ایوارڈ حاصل کیا جو انسان نما روبوٹکس نیٹ ورکس کی معاونت کرتا ہے۔

ڈیوائسز کے شعبے میں چینی ٹیکنالوجی برانڈ آنر نے کانگریس کے آغاز سے قبل اپنا روبوٹ فون متعارف کروایا اور سمارٹ فونز میں استعمال ہونے والی اپنی سیلیکون-کاربن بیٹری ٹیکنالوجی پر انقلابی ڈیوائس انوویشن کا ایوارڈ جیتا۔

"دی آئی کیو ایرا” کے موضوع پر منعقدہ موبائل ورلڈ کانگریس 2026 میں اے آئی کو ایک ایسی قوت کے طور پر اجاگر کیا گیا جو موبائل انڈسٹری کو "رابطے کے دور” سے نکال کر "ذہانت کے دور” میں منتقل کر رہی ہے۔