لاہور میں سموگ میں اضافے کے باعث موٹر سائیکل سٹینڈ بند اور چنگ چی رکشوں پر پابندی عائد کردی گئی۔لاہور انتظامیہ نے لاہور میں بڑھتی فضائی آلودگی پر قابو پانے کیلئے کارروائیاں تیز کردیں۔ انتظامیہ نے گرین لاک ڈاؤن ایریاز میں موٹرسائیکلوں کے سٹینڈ بند اور چنگ چی رکشوں پر پابندی لگا دی ہے۔
ایس پی ٹریفک سٹی منیر ہاشمی کے مطابق شملہ پہاڑی کے ارد گرد کا علاقہ گرین لاک ڈاؤن ایریا قرار دیا جا چکا ہے جس کے باعث ایجرٹن روڈ پر شاہین کمپلیکس اور نادرا دفتر کے باہر موٹرسائیکل اسٹینڈز ختم کردیے گئے ہیں۔منیر ہاشمی نے بتایا کہ ایمپریس روڈ، ایجرٹن روڈ، ڈیورنڈ روڈ اور ڈیوس روڈ سے شملہ پہاڑی کی جانب چنگ چی رکشوں کا داخلہ بھی بند کردیا گیا ہے۔
انہوں نے بتایا کہ گرین ایریاز میں سموگ کا باعث بننے والی گاڑیوں کیخلاف زیروٹالرنس پالیسی ہے، شہر بھر میں دھواں پھیلانے والی گاڑیوں کیخلاف بھی بلاامتیاز کارروائیاں جاری ہیں۔
