پشاور: مشیر اطلاعات خیبر پختونخوا بیرسٹر سیف نے کہا ہے کہ علی امین کے قافلے میں کوئی افغان باشندہ نہیں، وزیراعلی کے پاس اسلحہ ہوتا تو رات موٹروے پر نہ گزارتے، ان کے عزائم عمران خان کی رہائی، ملک میں قانون کی حکمرانی ہیں۔
تفصیلات کے مطابق وفاقی وزیر داخلہ کی پریس کانفرنس پر ردعمل دیتے ہوئے مشیر اطلاعات خیبرپختونخوا بیرسٹر سیف نے کہاکہ محسن نقوی کی پریس کانفرنس جھوٹ کا پلندہ ہے، علی امین کے قافلے کی جانب سے فائرنگ کا الزام جھوٹ پر مبنی ہے، وزیراعلی خیبرپختونخوا کے نہیں جعلی حکومت کے عزائم کچھ اور ہیں۔
انہوں نے کہا کہ علی امین گنڈاپور کے عزائم عمران خان کی رہائی اور ملک میں قانون کی حکمرانی ہے، محسن نقوی جعلی حکومت کی ذمہ داری وزیراعلیٰ خیبرپختونخوا پر نہ ڈالیں، انہوں نے کوئی ریڈ لائن کراس نہیں کی، وزیر داخلہ بدحواسی میں بھونڈے قسم کے الزامات لگارہے ہیں۔
انہوں نے کہا کہ کل اپنے آدمیوں کو اسلحہ تھما کر پی ٹی آئی پر عائد کردیا گیا، آج افغان باشندوں کی احتجاج میں شمولیت کا جھوٹا پروپیگنڈا کیا جا رہا ہے، خیبرپختونخوا سے آنیوالے قافلے میں پی ٹی آئی کارکن ہی موجود ہیں۔
انہوں نے کہا کہ پی ٹی آئی کارکنوں نے کسی پر شیلنگ نہیں کی، محسن نقوی جھوٹ بول کر عوامی رائے تبدیل نہیں کرسکتے، علی امین کے پاس اسلحہ ہوتا تو رات موٹروے پر نہ گزارتے۔ انہوں نے کہا کہ پی ٹی آئی کا جلوس پر امن اور ہمارے مقاصد واضح ہیں۔
