اسلام آباد: چیئرمین پی ٹی آئی بیرسٹر گوہر نے واضح کیا ہے کہ عہدیداروں کو ہٹا کر مذاکرات کا ماحول نہیں بن سکتا، ہر کسی کی مدت کا تعین آئین کے مطابق ہونا چاہئے، سیلاب متاثرین کیلئے قومی یکجہتی ضروری ہے۔
پارلیمنٹ ہاوس کے باہر میڈیا سے گفتگو کرتے ہوئے بیرسٹر گوہر نے کہا کہ پاک فوج کی ملک کیلئے بہت قربانیاں ہیں، ملک کا دفاع کیا ،جنگ جیتی ہم اس کو قدر کی نگاہ سے دیکھتے ہیں۔
انہوں نے کہا کہ ہر کسی کی مدت کا تعین آئین کے مطابق ہونا چاہئے، ہم نے نہ اس قانون سازی کو چیلنج کیا نہ کرنے کا ارادہ ہے، 2030ء تک کے پلان کی جہاں تک بات ہے تو پلان تو سب کرتے ہیں، دیکھتے ہیں کیا ہوتا ہے۔ انہوں نے کہا کہ اس وقت ملک میں سیلاب کی صورتحال ہے جس پر تمام جماعتوں کو سیاست اور صوبائیت سے
بالاتر ہوکر سب کی مدد کرنے کی ضرورت ہے،پنجاب حکومت سے بھی کہتا ہوں کہ مل کر سیلاب متاثرین کیساتھ تعاون کریں۔ انہوں نے کہا کہ خیبرپختونخوا حکومت سیلاب متاثرین کیلئے کوششیں کررہی ہے، پیر سے سیلاب متاثرہ علاقوں میں جا رہا ہوں، بونیر میں سیلاب متاثرین کے ساتھ ہوں گا۔
ایک سوال پر انہوں نے کہا کہ ہمارے اپوزیشن لیڈرز کو عہدوں سے ہٹا دیا گیا، بات چیت کا عمل کیسے ہو جب آپ ہمارے عہدیداروں کو ہٹارہے ہیں، ہمارے ارکان کو نااہل کیا جارہا ہے ایسے میں بات چیت ممکن نہیں ہے۔
