لاہور: وزیراعظم شہباز شریف نے ایثار، رواداری اور خدمت کو تہذیبی ورثہ قرار دیتے ہوئے قوم سے سیلاب متاثرین کی مدد کی اپیل کی ہے۔
عطیات کے عالمی دن پر جاری بیان میں وزیراعظم نے کہا کہ آج کے دن پاکستان دنیا کے ساتھ ہم آواز ہو کرمعاشرتی فلاح و بہبود، امداد و عطیات اور باہمی رواداری کی اہمیت کو اجاگر کرتا ہے۔
انہوں نے کہا کہ پاکستان کی معاشرتی تاریخ اس بات کی گواہ ہے کہ پاکستانی قوم بلا رنگ و نسل، بلا تعصب دوسروں کی بے لوث مدد میں ہمیشہ پیش پیش رہی ہے، یہ جذبہ خدمت نہ صرف ہماری سماجی و معاشرتی اقدار کا حصہ ہے بلکہ اسلامی تعلیمات اور ہماری تہذیب کی بھی روشن علامت ہے۔
انہوں نے کہا کہ پاکستان کے رضاکار اور خدمت گزار افراد نے ہر مشکل وقت (قدرتی آفات، حادثات، جنگ یا ایمرجنسی حالات)میں اپنے اہل وطن کی عملی اور مالی مدد کرکے انسانیت کی خدمت کی اعلی مثالیں قائم کی ہیں۔
وزیراعظم نے کہا کہ یہ بات قابل فخر ہے کہ عوام کی فلاحی کاموں اور عطیات میں شرکت کی بدولت پاکستان دنیا کے ان ممالک میں شمار ہوتا ہے جو سب سے زیادہ عطیات دینے والے ہیں۔ انہوں نے مخیر حضرات کی خدمات کو سراہتے ہوئے کہا کہ مفت علاج، دسترخوان، ایمبولینس سروسز جیسے بے شمار فلاحی منصوبے ان کی عطیات کی بدولت کامیابی سے جاری ہیں، جو معاشرتی فلاح کا منہ بولتا ثبوت ہیں۔وزیراعظم نے کہا کہ ہمیں فخر ہے کہ ہمارے معاشرے میں بے لوث خدمت، دوسروں کی امداد اور فلاحی کاموں میں شرکت کو قدر کی نگاہ سے دیکھا جاتا ہے، عوام، تنظیمیں اور ادارے اس جذبے کو مزید مضبوط کریں اور ایک ایسا معاشرہ تشکیل دیں جو رواداری، ایثار اور خدمتِ خلق پر مبنی ہو۔
وزیراعظم نے کہا کہ حالیہ شدید بارشوں اور سیلابی صورتحال کے پیش نظر باہمی رواداری، امداد و عطیات کے اس سماجی جذبے نے اور بھی اہمیت اختیار کر لی ہے، سیلابی صورتحال کے پیش نظر متاثرہ آبادی کے مال و مویشی، روزگار اور گھروں کو شدید نقصان پہنچا ہے، متاثرہ آبادی اشیائے خور و نوش، چھت اور صحت کی سہولیات کے منتظر ہے جس کیلئے وفاقی حکومت، صوبائی حکومتیں، عوام اور فوج سب مل کر ریسکیو اینڈ ریلیف آپریشن کو جاری رکھے ہوئے ہیں۔
انہوں نے کہا کہ میں پاکستانی عوام اور دنیا بھر میں موجود پاکستانیوں کو سیلاب کے بعد ریلیف و بحالی کے کاموں میں اپنے ہم وطنوں کی ہر ممکن مدد کرنے کی یاد دہانی کرواتا ہوں، باہمی رواداری اور مدد کے جذبے پر عمل پیرا ہوتے ہوئے ہم بحیثیت قوم ترقی و خوشحالی، باوقار اور مضبوط مستقبل کیلئے پرعزم ہیں۔
