ڈی جی خان : وزیراعلیٰ پنجاب مریم نواز نے سکول نیوٹریشن پروگرام کا افتتاح کرتے ہوئے کہا ہے کہ بچوں کی غذائی ضرورت پوری کرنے کیلئے جو کرسکتی ہوں کروں گی،قوم کے پیسے میں ایک روپے کی بھی خیانت ہوئی تو اللہ معاف نہیں کرے گا، کوشش ہے سرکاری سکولوں کے بچے پرائیویٹ سکولوں کے بچوں سے پیچھے نہ رہیں، ہر سہولت فراہم کی جائے، مہنگائی میں کمی کیلئے کوششیں جاری ہیں۔
تفصیلات کے مطابق وزیراعلی پنجاب مریم نواز نے ڈی جی خان میں سکول نیوٹریشن پروگرام کی افتتاحی تقریب سے خطاب کرتے ہوئے کہا کہ لاہور سے ڈی جی خان جتنا بھی دور ہو میں آپ سے دور نہیں، سب بچوں کیلئے ایک ماں کی طرح سوچتی ہوں، یہ بچے میرے لئے وی آئی پیز ہیں۔
انہوں نے کہا کہ میرا خیال تھا ڈی جی خان کے بچے مجھے نہیں جانتے لیکن یہ مجھے پہلے سے جانتے ہیں،آج ان سے ملنے والا پیار بتا نہیں سکتی۔ انہوں نے کہا کہ ڈیرہ غازی خان سے سکول نیوٹریشن پروگرام کا آغاز کیا جارہا ہے، ہم پانچویں کلاس تک کے بچوں کیلئے مفت دودھ کا پروگرام لائے ہیں۔
انہوں نے کہا کہ میرے پاس پنجاب میں ہزاروں سکول ہیں جن میں لاکھوں بچے پڑھتے ہیں، پاکستان امیر ملک نہیں،وسائل تھوڑے ہیں، اچھا وقت آئے گا اور آرہا ہے، پوری کوشش ہوگی بچوں کی غذائی ضرورت پوری کرنے کیلئے جو کچھ کرسکتی ہوں وہ کروں۔
انہوں نے کہا کہ بہت سے لوگ مختلف باتیں کرتے ہیں،جب عملی کام کرنے کی باری آتی ہے تو کچھ نظر نہیں آتا، چاہتی ہوں عملاً آپ کیلئے کچھ کرکے دکھاؤں تاکہ آپ کو لگے آپ کی وزیراعلیٰ ماں کی طرح ہے۔ انہوں نے کہا کہ ہم ڈیرہ غازی خان اور مظفر گڑھ سے اس پروگرام کولانچ کرنے جارہے ہیں۔
انہوں نے کہا کہ یہاں وزارت تعلیم کی پوری ٹیم بیٹھی ہے، میری تعلیمی ٹیم آپ کیلئے دن رات کام کررہی ہے، قوم اور عوام کا پیسہ آپ کا پیسہ ہے، قوم کے پیسے میں ایک روپے کی خیانت بھی ہوئی تو اللہ معاف نہیں کرے گا، چاہتی ہوں آپ کا پیسہ بغیر کسی غلط کام کے آپ تک پہنچے۔
انہوں نے کہا کہ وزیر تعلیم رانا سکندر حیات دل سے ان بچوں کیلئے کام کررہے ہیں، ہم ٹیچر ٹریننگ، سکولوں کی آؤٹ سورسنگ اور سپورٹس پر کام کررہے ہیں، کوشش ہے سرکاری سکولوں کے بچے پرائیویٹ سکولوں کے بچوں سے پیچھے نہ رہیں، انہیں ہر سہولت فراہم کی جائے۔
انہوں نے کہا کہ بچوں کو بغیر کسی خودرد برد اور قیمت کے دودھ ملنا وزیر تعلیم کی ذمہ داری ہے، اس پروگرام کو تسلسل کے ساتھ آئندہ پانچ سال چلانا صوبائی وزیرتعلیم کی ذمہ داری ہے، پورے پاکستان میں ایسا پروگرام شروع ہونا چاہئے، باقی صوبوں کے بچے بھی میرے بچے ہیں، باقی صوبو ں کے وزرائے اعلیٰ کو بھی ایسا پروگرام شروع کرنا چاہئے۔
انہوں نے کہا کہ پنجاب وہ واحد صوبہ ہے جس میں نوازشریف کے وژن سے مہنگائی میں کمی لائے ہیں، پنجاب میں آٹے،روٹی اور سبزیوں کی قیمتیں کم ہوئی ہیں، ہم روز مہنگائی کو کم کرنے کیلئے سرتوڑ کوششیں کررہے ہیں، پہلی بار مہنگائی 35فیصد سے کم ہوکر سنگل ڈیجٹ پر آئی ہے۔
انہوں نے کہا کہ پہلے نوازشریف کے دور میں مہنگائی سنگل ڈیجٹ میں تھی، یہ بھی نوازشریف کی ہی حکومت ہے، 7سال بعد مہنگائی آج دوبارہ سنگل ڈیجٹ پر آئی ہے۔ انہوں نے کہا کہ بچوں کو بتانا چاہتی ہوں آپ سے دل سے پیار کرتی ہوں، کوشش ہے آپ کی زندگیوں میں بہتری آئے۔
انہوں نے کہا کہ بچوں کو تلقین کرتے ہوئے کہا کہ آپ نے اپنے ملک سے پیار کرنا ہے،اس کیخلاف کوئی کام نہیں کرنا، دنیا چاہے جو کررہی ہے اس کو کرنے دیں آپ نے وطن کی محبت اور سلامتی کیلئے کام کرنا ہے، آپ کا ہرقدم وطن کی سلامتی کیلئے ہی اٹھنا چاہئے۔
