اسلام آباد: صدرمملکت آصف زرداری نے کہا ہے کہ یورپی یونین پاکستان کے بڑے تجارتی و سرمایہ کاری شراکت داروں میں شامل ،تعلقات خطے کے استحکام ،عالمی سلامتی میں اہم کردار ادا کرتے ہیں، تجارت، ماحولیات، ہجرت و علاقائی امن جیسے مشترکہ اہداف پاک یورپی شراکت داری کو مزید تقویت دیں گے۔
جاری بیان کے مطابق صدر مملکت سے پاکستان میں یورپی یونین کے سفارتی مشن کی سبکدوش ہونیوالی سربراہ ڈاکٹر رینا کیونکانے الوداعی ملاقات کی دوران کیا۔آصف زرداری نے ڈاکٹر رینا کیونکا کی پاک یورپی تعلقات کے فروغ میں خدمات کو سراہتے ہوئے ان کیلئے نیک خواہشات کا اظہار کیا۔
صدر مملکت نے کہا کہ پاکستان یورپی یونین کے ساتھ اپنے کثیرجہتی تعلقات کو خصوصی اہمیت دیتا ہے ،پاکستان اور یورپی یونین کے مضبوط تعلقات خطے کے استحکام اور عالمی سلامتی میں اہم کردار ادا کرتے ہیں ،یورپی یونین پاکستان کے بڑے تجارتی اور سرمایہ کاری شراکت داروں میں شامل ہے۔
صدر نے کہا کہ ایراسمس منڈس اور ہورائزن یورپ پروگرام پاکستان کے نوجوانوں کیلئے قیمتی تعلیمی اور تحقیقی مواقع فراہم کرتے ہیں، ہم یورپی اسٹریٹجک انگیجمنٹ پلان پر مکمل عمل درآمد کیلئے پرعزم ہیں۔ انہوں نے کہا کہ تجارت، ماحولیات، ہجرت اور علاقائی امن جیسے مشترکہ اہداف پاک یورپی شراکت داری کو مزید تقویت دیں گے ۔
