لاہور: لاہور ہائیکورٹ نے جنسی زیادتی کی شکار خاتون کے مقدمے کی تحقیقات جے آئی ٹی سے کروانے کی درخواست مسترد کرتے ہوئے واضح کیا ہے کہ زیادتی مقدمات میں خواتین سے تفتیش صرف جنسی جرائم سے متعلق تربیت یافتہ خاتون افسر ہی کر سکتی ہے۔
لاہور ہائیکورٹ کے جسٹس طارق سلیم شیخ نے 9صفحات پر مشتمل جاری تفصیلی تحریری فیصلے میں کہا ہے کہ قانون کے مطابق زیادتی جیسے حساس مقدمات میں متاثرہ فریق کی عزتِ نفس اور ذہنی کیفیت کا بھرپور خیال رکھنا لازمی ہے، اس لیے ایسے کیسز کی تفتیش مرد افسران یا عام تحقیقاتی ٹیموں کے ذریعے نہیں کی جا سکتی۔
عدالت نے قرار دیا کہ خواتین سے جنسی جرائم کی تفتیش صرف جنسی جرائم سے متعلق تربیت یافتہ خاتون افسر ہی کر سکتی ہے۔ عدالت نے کہا کہ اینٹی ریپ (انویسٹی گیشن اینڈ ٹرائل) ایکٹ 2021ء کے سیکشن 9کے تحت ایسے مقدمات کی تفتیش کیلئے خصوصی یونٹ قائم کیا جانا ضروری ہے جس میں جنسی جرائم کی تربیت یافتہ افسران شامل ہوں۔
