اسلام آباد: چیئرمین سینیٹ یوسف رضا گیلانی نے عالمی امن کیلئے انصاف، مکالمے اور انسانی وقار کو ترجیح دینے کی ضرورت پر زور دیتے ہوئے مطالبہ کیا ہے کہ عالمی طاقتیں مفادات نہیں، اخلاقی ذمہ داری کے تحت کردار ادا کریں۔
جاری بیان کے مطابق وینس میں منعقدہ عالمی امن کانفرنس میں ‘آج کے عالمی امن کو درپیش چیلنجز’ کے موضوع پر خطاب کرتے ہوئے چیئرمین سینیٹ سید یوسف رضا گیلانی نے کہا کہ شہباز بھٹی شہید کو خراج عقیدت پیش کرتے ہیں، ان کی شہادت عالمی ضمیر کیلئے قربانی کی علامت ہے۔
انہوں نے کہا کہ پیپلز پارٹی نے ہمیشہ انصاف اور بین المذاہب ہم آہنگی کی علمبرداری کی۔
انہوں نے کہا کہ امن صرف جنگ کا نہ ہونا نہیں، بلکہ انصاف کی موجودگی ہے،عالمی برادری امن کیلئے انصاف، مکالمہ اور انسانی وقار کو ترجیح دی جائے۔
انہوں نے زور دیا کہ عالمی طاقتیں مفادات نہیں، اخلاقی ذمہ داری کے تحت کردار ادا کریں۔
چیئرمین سینیٹ نے مسئلہ کشمیر کے حل کیلئے عالمی ضمیر کو متحرک کرنے کی ضرورت پر زور دیتے ہوئے کہا کہ وینس کانفرنس بین المذاہب ہم آہنگی اور امن کیلئے پاکستان کے عزم کا مظہر ہے،یہ کانفرنس نہیں، ایک عالمی عہد ہے جسے نبھانا ہوگا۔
