سپریم کورٹ نے استفسار کیاہے کہ سپر ٹیکس سے جمع کی گئی رقم کس طرح تقسیم ہوتی ہے؟،کیا قانون سازی کے بغیر سپر ٹیکس لگایا جاسکتاہے؟جبکہ وکیل ایف بی آر رضا ربانی نے عدالت کو آگاہ کیا ہے کہ سپر ٹیکس اور انکم ٹیکس دو الگ چیزیں ہیں سپر ٹیکس کسی خاص مقصد کیلئے لگایا جاتا ہے۔ پیرکو سپریم کورٹ میں جسٹس امین الدین خان کی سربراہی میں پانچ رکنی آئینی بینچ نے سپر ٹیکس بارے کیس پر سماعت کی ۔
جسٹس جمال خان مندوخیل نے استفسار کیا کہ وکیل ایف بی آر سے استفسار کیا کہ آپ یہ بتا دیں کہ یہ ٹیکس آرٹیکل 173کے تحت ہی لگایا تھا یا نہیں؟۔وکیل ایف بی آر رضا ربانی نے بتایا کہ ٹیکسیشن کا پورا طریقہ کار آرٹیکل 173میں واضح کیا گیا ہے، خزانہ کی قائمہ کمیٹی بجٹ طے کر کے ایوان بالا میں بھیجتی ہے وہاں سے پھر بجٹ اپروو ہوتا ہے۔رضا ربانی نے کہا کہ فور بی لوکل مقاصد کیلئے نہیں ہوتا وہ لوکل باڈی کیلئے ہوتا ہے،
فور بی میں واضح ہے سپر ٹیکس تباہ شدہ گھروں کی مرمت کے لیے استعمال ہوگا اس میں علاقہ واضح نہیں ہے۔ سپر ٹیکس اور انکم ٹیکس دو چیزیں ہیں سپر ٹیکس کسی خاص مقصد کیلئے لگایا جاتا ہے۔جسٹس جمال خان مندوخیل نے ریمارکس دیئے سپر ٹیکس سے جمع کی گئی رقم کس طرح تقسیم ہوتی ہے، کیا قانون سازی کے بغیر آپ سپر ٹیکس لگا سکتے ہیں؟۔
رضا ربانی نے کہا کہ سپر ٹیکس کے حوالے سے قانون سازی کی گئی تھی، سپر ٹیکس کا سارا پیسہ وفاقی مجموعی بجٹ میں جاتا ہے۔جسٹس جمال خان کہا کہ وفاقی مجموعی بجٹ کو کس طرح استعمال کرنا ہے یہ آرٹیکل 175میں بتایا گیا ہے۔رضا ربانی نے بتایا کہ سپر ٹیکس کے حوالے سے 2016کے دیباچے میں لکھا ہوا ہے کہ رقم پہلے وقافی مجموعی بجٹ میں جائے گی۔بعد ازاں عدالت نے کیس کی سماعت (آج) منگل کی دوپہر تک ملتوی کردی ۔
