صدر آصف زرداری نے کہا ہے کہ بھارتی اقدامات سے علاقائی امن و استحکام کو خطرہ لاحق ہے،مشکل وقت میں پاکستان کا ساتھ دینے کیلئے چینی حکومت کی مسلسل حمایت کو سراہتے ہیں۔پیر کو پاکستان میں چینی سفیر چیانگ زئے ڈونگ نے صدر زرداری سے ملاقات کی جس میں دو طرفہ اہمیت کے امور، خاص طور پر پہلگام واقعے کے بعد پاک بھارت موجودہ صورتحال پر تبادلہ خیال کیا گیا۔
صدر نے بھارتی حکومت کے حالیہ غیر ذمہ دارانہ اور جارحانہ بیانات پر تشویش کا اظہار کرتے ہوئے کہا کہ بھارت کے اقدامات سے علاقائی امن و استحکام کو خطرہ لاحق ہے۔اس موقع پر چینی سفیر نے چین ، پاکستان کے درمیان پائیدار اور آزمودہ دوستی کا اعادہ کرتے ہوئے کہا کہ دونوں ممالک آہنی بھائی ہیں، ہمیشہ مشکل وقت میں ایک دوسرے کا ساتھ دیا۔ انہوں نے کہا کہ چین جنوبی ایشیا میں امن و استحکام کی دونوں ممالک کی مشترکہ خواہش کے حصول کیلئے ہمیشہ پاکستان کی حمایت کرے گا۔انہوں نے پاکستان کے نقطہ نظر کو چین کے ساتھ شیئر کرنے پر صدر مملکت کا شکریہ ادا کیا۔صدر مملکت نے مشکل وقت میں پاکستان کا ساتھ دینے کیلئے چینی حکومت کی مسلسل حمایت کو سراہا۔
