وزیراعظم آزاد کشمیر چودھری انوارالحق نے کہا ہے کہ افواج پاکستان ملکی دفاع کیساتھ کشمیریوں کو کبھی تنہا نہیں چھوڑے گی ، شہباز شریف نے ہمیشہ آزاد کشمیر کے مسائل کو اہمیت دی، پاکستانی قوم نے ثابت کیا وہ کشمیریوں کی تحریک میں ان کے شانہ بشانہ ہیں۔
یوم یکجہتی کشمیر پر آزاد جموں و کشمیر قانون ساز اسمبلی کے خصوصی اجلاس سے خطاب کرتے ہوئے وزیراعظم آزاد کشمیر چودھری انوار الحق نے کہا کہ وزیراعظم پاکستان اور مسلح افواج کی بہترین پالیسیوں سے کشمیر کا تحفظ ممکن ہے افواج پاکستان جہاں ملکی دفاع کیلئے ہمہ وقت تیار ہیں وہیں کشمیریوں کو بھی تنہا نہیں چھوڑیں گی۔ انہوں نے کہا کہ مستحکم پاکستان ہی تحریک آزادی کشمیر کی کامیابی کی واحد ضمانت ہے، کشمیر کی تکمیل پاکستان کا نامکمل ایجنڈا ہے،
اس مشن کو پورا کرنا ہماری ترجیح ہے۔ انہوں نے کہا کہ مقبوضہ کشمیر کیلئے پاکستان کی حمایت میں کمی آئی نہ آئے گی۔ وزیراعظم شہباز شریف نے آزاد کشمیر کے مسائل کے حل کو ہمیشہ اہمیت دی اور پاکستانی قوم نے ثابت کیا کہ وہ کشمیریوں کی تحریک میں ان کے شانہ بشانہ ہیں۔
