کراچی پولیس نے گلبرگ رحمن آباد بلاک 5 کے گھر سے 30 سالہ خاتون یاسمین اور 35 سالہ مرد خدا بخش کی گلا کٹی اور پھندا لگی نعشیں برآمد کرلیں۔
پولیس ترجمان کے مطابق گلبرگ کے علاقے مکان نمبر B-182 بلاک 5 رحمن آباد محمدی مسجد کے قریب خاتون اور مرد کی لاشوں کی موجودگی کے اطلاع پر پولیس موقع پر پہنچی۔ گھر میں داخل ہوئے تو خاتون کی گلا کٹی نعش کمرے میں موجود تھی جبکہ مرد کی لاش پنکھے سے لٹکی ہوئی تھی۔
پولیس نے موقع پر فارنزک حکام کے ایکسپرٹ کو طلب کر کے شواہد اکھٹے کئے اور بعد ازاں جاں بحق خاتون اور مرد کی نعشیں ایدھی ایمبولینسوں کے ذریعے عباسی شہید ہسپتال منتقل کی گئیں۔
ترجمان کراچی پولیس کے مطابق جاں بحق ہونیوالوں کی شناخت 35سالہ خدا بخش ولد اللہ بخش اور خاتون کی 30سالہ یاسمین زوجہ خدا بخش کے ناموں سے کی گئی۔
پولیس کے مطابق واقعے کی تحقیقات شروع کردی گئی ہیں۔
