وزیراعلی پنجاب مریم نواز نے دسمبر تک پنجاب میں 1115 الیکٹرو بسیں فعال کرنے کی ہدایت کرتے ہوئے نئے سٹاپس اور چارجنگ سٹیشنز کے قیام ،پنجاب بھر میں بوتل بند پانی کی گھر گھر فراہمی اور پلیسر گولڈ پراجیکٹ منصوبوں کی منظوری دے دی۔
ہفتے کو وزیراعلی پنجاب مریم نواز کی زیرصدارت 4گھنٹے طویل جائزہ اجلاس ہوا جس میں مختلف محکموں سے تفصیلی بریفنگ لی گئی اور متعدد اہم فیصلے کئے گئے۔
وزیراعلی کو بتایا گیا کہ سیلاب کے دوران سانپ کے کاٹنے کے 174واقعات سامنے آئے ہیں لیکن فلڈ ریلیف کیمپوں میں موجود ویکسین کی فراہمی کی بدولت تمام جانیں بچ گئیں۔ وزیراعلی نے سیلاب متاثرہ علاقوں میں 11.5لاکھ افراد کی طبی سہولتوں کی فراہمی پر اطمینان کا اظہار کرتے ہوئے شعبہ صحت کی کارکردگی کو سراہا ۔وزیراعلی نے صوبہ بھر میں پانی فراہمی بارے اہم اقدامات اٹھانے کا حکم دیا۔
مریم نواز نے دور دراز علاقوں میں پانی کمی دور کرنے کیلئے گھر گھر بوتل بند پانی فراہم کرنے کا منصوبہ شروع کرنے کا اعلان کیا اور پنجاب بھر میں 5ہزار سے زائد واٹر فلٹریشن پلانٹس کو فعال ،کارکردگی کا جائزہ لینے کیلئے ٹائم لائن طلب کرلی۔
وزیراعلی نے ہدایت کی کہ محکمے واٹر فلٹریشن پلانٹس کا جائزہ لے کر ان کی تکمیل یقینی بنائیں۔وزیراعلی نے پنجاب میں ماحول دوست ٹرانسپورٹ کی سہولت فراہم کرنے کیلئے دسمبر تک 1115الیکٹرو بسوں کو عملی جامہ پہنانے کی ہدایت کی۔ اجلاس میں ڈپٹی کمشنرز کو چارجنگ سٹیشنز کے قیام کی ہدایت کرتے ہوئے الیکٹرو بسوں کیلئے نئے سٹاپ ڈیزائن بھی منظور کئے گئے۔وزیراعلی نے ہدایت کی کہ سپیشل افراد کیلئے خصوصی سکیمیں بنائی جائیں اور ان کے گھروں تک سہولتیں پہنچائی جائیں۔
وزیراعلی نے لاہور ڈویلپمنٹ پروجیکٹ کے تحت 4624گلیوں کی تعمیر اور بحالی کے کام کو جلد مکمل کرنے کی ہدایت کرتے ہوئے کہا کہ نو تعمیر شدہ گلیوں کی حفاظت کرنا ضروری ہے ،اس سلسلے میں سخت اقدامات اٹھائے جائیں۔ اجلاس میں پلیسر گولڈ پراجیکٹ شروع کرنے کا فیصلہ کیا گیا ، وزیراعلی نے ہدایت کی کہ منصوبے سے حاصل ہونیوالا منافع عوامی فلاح کیلئے استعمال کیا جائے۔
وزیراعلی کو بتایا گیا کہ چنیوٹ میں آئرن اور میانوالی میں پلیسر گولڈ کی کانوں کی ابتدائی سٹڈی مکمل کر لی گئی ہے ،منصوبے کے آغاز میں صرف 4ماہ کی مدت باقی ہے۔وزیراعلی نے ملتان کے 62، بہاولپور کے 48 اور ڈی جی خان کے 38 دیہات کو مثالی گائوں بنانے کی ہدایت کرتے ہوئے کہا کہ گائوں میں جدید سہولیات فراہم کی جائیں۔
وزیراعلی نے حکومتی محکموں کو سختی سے ہدایت دی کہ وہ ان منصوبوں کی تکمیل میں اپنی پوری کوشش کریں تاکہ عوام کو بہترین خدمات فراہم کی جا سکیں۔
وزیراعلی نے سروائیکل کینسر ویکسی نیشن کی مہم میں کامیابی پر اظہار اطمینان کرتے ہوئے کہا کہ صوبے میں 65لاکھ بچیوں کو ویکسی نیشن فراہم کی جا چکی ہے جس سے پنجاب نے دوسرے صوبوں کو پیچھے چھوڑ دیا ہے۔
