وفاقی و صوبائی حکومتوں نے سیلاب نقصانات کے باعث آئی ایم ایف سے بجٹ سرپلس ہدف پر نظرثانی کی استدعاء کردی۔
ذرائع وزارت خزانہ کے مطابق دوسرے اقتصادی جائزہ کیلئے آئی ایم ایف جائزہ مشن اور پاکستانی حکام کے درمیان تکنیکی سطح کے مذاکرات جاری ہیں جس کی تکمیل کے بعد پالیسی سطح کے مذاکرات ہوں گے۔
ذرائع کے مطابق سیلاب کے باعث 1464ارب کاصوبائی بجٹ سرپلس ہدف حاصل نہ ہونے کا امکان ہے جس پر صوبائی حکومتوں نے آئی ایم ایف سے بجٹ سرپلس ہدف پر نظرثانی کا مطالبہ کیا ہے جبکہ وفاق نے بھی پرائمری بجٹ سرپلس کے3.1ٹریلین ہدف میں نظرثانی کی درخواست کی ہے۔
ذرائع کے مطابق گزشتہ مالی سال میں بھی صوبوں نے ہدف سے280ارب روپے کم بجٹ سرپلس دیا تھا۔ ذرائع کے مطابق رواں سال پنجاب کا 740ارب روپے کا پرائمری بجٹ سرپلس ہدف حاصل نہ ہونے کا خدشہ ہے پنجاب حکومت نے مذاکرات میں بجٹ سرپلس پر ابھی کوئی حتمی یقین دہانی نہیں کروائی، سندھ نے بھی مشن کو 370ارب بجٹ سرپلس کے ہدف میں نظرثانی کی درخواست کی ہے جبکہ خیبرپختونخوا نے بجٹ سرپلس وفاقی حکومت سے تمام شیئر ملنے سے منسلک کردیاہے۔
