بیجنگ: پاکستان اور چین نے سی پیک فیز2 کے تحت 5نئے کورڈورز کے قیام، گوادر بندرگاہ جلد فعال کرنے کا فیصلہ کرتے ہوئے سائنس وٹیکنالوجی، آئی ٹی، زراعت سمیت مختلف مفاہمی یاداشتوں و معاہدوں پر دستخط کردیئے جبکہ وزیراعظم شہباز شریف نے پاکستان کی خودمختاری و ترقی میں تعاون پر چینی قیادت سے اظہار تشکر کرتے ہوئے صدر شی جن پھنگ کے عالمی گورننس انیشی ایٹو، گلوبل ڈویلپمنٹ انیشی ایٹو،گلوبل سیکیورٹی انیشی ٹو اور گلوبل سولائزیشن انیشی ایٹو کی بھرپور حمایت کا اعادہ کیاہے۔
جاری بیان کے مطابق وزیراعظم شہباز شریف نے بیجنگ میں چینی ہم منصب لی چیانگ سے ملاقات کی ۔ اس موقع پر چینی وزیراعظم کی جانب سے وزیراعظم کے اعزاز میں پروقار ظہرانے کا اہتمام کیا گیا۔ دونوں رہنمائوںنے پاک چین تعلقات کی مثبت رفتار پر اطمینان کا اظہار کیا جب کہ وزیراعظم نے پاکستان کی علاقائی سالمیت، خودمختاری اور سماجی و اقتصادی ترقی کیلئے غیر متزلزل حمایت پر چینی قیادت اور قوم کا تہہ دل سے شکریہ ادا کیا۔
دونوں رہنماں نے چینی صدر شی جن پھنگ اور وزیراعظم شہباز شریف کے درمیان 2ستمبر 2025ء کو ہونیوالی ملاقات میں طے پانے والے اہم اتفاق رائے کی روشنی میں پاک چین ہمہ موسمی تزویراتی تعاون کو مزید مضبوط بنانے کے عزم کا اعادہ کیا۔
اس موقع پر مشترکہ ایکشن پلان 2024-29ء پر دستخط کو اہم پیش رفت قرار دیا گیا۔وزیراعظم نے کہا کہ پاکستان میں جاری اصلاحاتی اقدامات کے مثبت نتائج چین کی بھرپور حمایت کے باعث ممکن ہو سکے ہیں، انہوں نے جلد ہی چینی کیپٹل مارکیٹ میں پانڈا بانڈز کی فراہمی کے پاکستان کے ارادے کا بھی اظہار کیا۔
وزیراعظم نے سی پیک کو پاکستان کی ترقی کیلئے اہم قرار دیا اور قراقرم ہائی وے ، ریلوے لائن ایم ایل 1کی بحالی اور گوادر پورٹ جلد فعال کرنے پر زور دیا۔اس موقع پر دونوں ممالک نے سی پیک فیز2کے تحت 5نئی اقتصادی راہداریوں پر مل کر کام کرنے پر اتفاق کیا۔
وزیراعظم نے بزنس ٹو بزنس تعاون اور سرمایہ کاری کے وسیع امکانات پر زور دیتے ہوئے چینی وزیر اعظم کو بیجنگ میں ہونیوالی سرمایہ کاری کانفرنس کے بارے میں بتایا جس میں 300سے زائد پاکستانی کمپنیاں اور 500چینی کمپنیاں شریک ہو رہی ہیں۔شہباز شریف نے زراعت، کان کنی و معدنیات، ٹیکسٹائل، صنعتی شعبے اور آئی ٹی کو باہمی طور پر فائدہ مند اقتصادی تعاون کے لیے ترجیحی شعبے قرار دیا۔
وزیراعظم نے صدر شی جن پھنگ کے عالمی گورننس انیشی ایٹو، گلوبل ڈویلپمنٹ انیشی ایٹو،گلوبل سیکیورٹی انیشی ایٹو اور گلوبل سولائزیشن انیشی ایٹو کی بھرپور حمایت کا اعادہ کیا۔ دونوں رہنمائو ں نے 2026میں پاک چین تعلقات کی 75ویں سالگرہ شاندار انداز میں منانے پر بھی اتفاق کیا۔
جاری بیان کے مطابق اس موقع پر دونوں ممالک نے چین پاکستان اقتصادی راہداری کے فیز 2کی ترقی، سائنس و ٹیکنالوجی ، انفارمیشن ٹیکنالوجی ، میڈیا اور زراعت، میں تعاون بڑھانے کے حوالے سے مفاہمتی یادداشتوں اور معاہدوں پر بھی دستخط کئے۔
