اسلام آباد: ترجمان وفاقی وزارت خزانہ نے کہا ہے کہ آئی ایم ایف ایگزیکٹو بورڈ سے سٹاف لیول معاہدے کی منظوری جلد متوقع ہے،کمرشل بینکوں سے قرض بارے بات چیت حتمی مراحل میں ہے، امید ہے مثبت نتیجہ سامنے آئے گا، پنجاب حکومت کی بجلی کے بلوں پر سبسڈی سے اب کوئی مسئلہ نہیں۔
تفصیلات کے مطابق نجی ٹی وی سے گفتگو کرتے ہوئے ترجمان وفاقی وزارت خزانہ نے کہا کہ پاکستان اور آئی ایم ایف کے مذاکرات صرف بیرونی فنانسنگ گیپ پورا کرنے پر ہو رہے ہیں،دوست ممالک سے روول اوور کے بارے آئی ایم ایف مطمئن ہے، ایف بی آر کی طرف سے ٹیکس وصولیوں پر آئی ایم ایف سے کوئی بات نہیں ہو رہی، وزارت خزانہ اور ایف بی آر ٹیکس وصولیاں بہتر بنانے پر بات کر رہے ہیں۔
انہوں نے کہا کہ یو اے ای بینک اور ایک گلوبل بینک سے کمرشل قرض پر بات چیت جاری ہے،جو حتمی مرحلے میں ہے، اْمید ہے جلد مثبت نتیجہ سامنے آئے گا۔انہوں نے کہا کہ کوشش ہے کمرشل بینکوں سے کمٹمنٹ جلد حاصل کر لیں، یہ فیصلہ پاکستان نے کرنا ہے کہ کمرشل بینکوں سے یہ رقم کس وقت لی جائے۔
انہوں نے کہا کہ کوشش ہے کہ کمرشل بینکوں سے کم سے کم شرح سود پر قرض لیں۔انہوں نے بتایا کہ آئی ایم ایف ایگزیکٹو بورڈ سے اسٹاف لیول معاہدے کی منظوری جلد متوقع ہے۔ایک سوال پر انہوں نے کہا کہ پنجاب حکومت کی بجلی کے بلوں پر سبسڈی سے اب کوئی مسئلہ نہیں ہے۔
