وزیر دفاع خواجہ آصف نے کہا ہے کہ پاکستان عالمی سطح پر قابل اعتماد شراکت دار کے طور پر ابھر رہا ہے، حکومتی اصلاحات اور اعتماد پر مبنی سفارتکاری جاری ہے، ملکی خارجہ پالیسی نئے مرحلے میں داخل ہوچکی ہے ۔
انسٹیٹیوٹ آف ریجنل اسٹڈیز اسلام آباد کے زیر اہتمام سیمینار سے خطاب میں خواجہ آصف نے کہا کہ سعودی عرب کیساتھ تعلقات نئے دور میں داخل ہو گئے ہیں، پاکستان عالمی سطح پر ایک قابلِ اعتماد شراکت دار کے طور پر ابھر رہا ہے، امریکہ اور دبئی کیساتھ بھی تعلقات میں بہتری آ رہی ہے۔
انہوں نے کہا کہ پاکستان کی خارجہ پالیسی نئے مرحلے میں داخل ہو چکی ہے، سعودی عرب کی جانب سے شعبوں میں سرمایہ کاری میں اضافہ ہو رہا ہے، قطر اور متحدہ عرب امارات کیساتھ پاکستان کے تعلقات مثالی قرار دیئے جا رہے ہیں، یہ شراکت داری باہمی اعتماد اور سمجھ بوجھ پر مبنی ہے۔
انہوں نے کہا کہ چین پاکستان کا ہر موسم کا دوست ہے دونوں ممالک سی پیک فیز تھری پر کام بڑھانے کیلئے پرعزم ہیں۔ انہوں نے کہا کہ پاکستان کی وسط ایشیائی ممالک آذربائیجان اور ترکمانستان تک رسائی میں نمایاں بہتری آئی ہے، پاکستان ترکی اور ایران کیساتھ بھی تعلقات کو مزید مضبوط بنا رہا ہے جبکہ اسلاموفوبیا کیخلاف مو ثر آواز بن کر ابھرا ہے۔
انہوں نے کہا کہ حکومتی اصلاحات مکمل توجہ ہے، ہماری سفارت کاری اعتماد اور استحکام کی عکاسی کر رہی ہے۔
