وفاقی وزیر احسن اقبال نے کہا ہے کہ او لیول اور اے لیول نے ہماری جڑیں کھوکھلی کردیں، ہمیں شیکسپیئر کا معلوم، اپنے ہیروز کا علم نہیں، سوشل میڈیا کے ذریعے منفی نظریات کا پھیلائو خطرناک ہے، نوجوانوں کو اس سے بچانا ہو گا۔
کراچی میں میڈیا سے گفتگو کرتے ہوئے احسن اقبال نے کہا کہ پہلی سے چوتھی جماعت تک عائشہ باوانی سکول میں پڑھا ہوں، باوانی فیملی کی تعلیم میں بہت کاوشیں ہیں، میرے بچپن میں کراچی ترقی یافتہ اور روشنیوں کا شہر ہوا کرتا تھا، میری دعا ہے کہ کراچی اپنی پرانی عظمت کو بحال کر سکے۔
انہوں نے کہا کہ طالبعلم سکول میں تعلیم حاصل کر رہے کل کو کوئی بھی ملک کا وزیر بن سکتا ہے، سائنس اور ٹیکنالوجی میں ہم سب سے پیچھے ہیں، ہمارے تعلیمی ادارے فقط روزگار مہیا کرنے کیلئے نہیں بلکہ مستقبل کی بنیاد رکھ رہے ہیں۔
انہوں نے کہا کہ یہ مستقبل کی جنگ ہے جو لیبارٹریز کے اندر لڑی جا رہی ہے، نئی ایجادات ہونی چاہئیں تاکہ دنیا کے ساتھ مقابلہ کر سکیں، او لیول اور اے لیول کو بڑھاوا دیا ہے، اس سے ہماری روٹس خراب ہو گئی ہیں، ہمیں شیکسپیئر کا معلوم ہوگا لیکن اپنے ہیروز کا علم نہیں ہے۔
انہوں نے کہا کہ سوشل میڈیا کے ذریعے منفی نظریات کا پھیلائو بہت خطرناک ہے، منفی پروپیگنڈا اور منفی نظریات کی وجہ سے مجھ پر چلائی گئی گولی ابھی تک میرے جسم میں ہے، ہمیں اپنے نوجوانوں کو منفی نظریات سے بچانا ہو گا۔
