بیجنگ: وزیراعظم شہباز شریف نے وزارت داخلہ و صحت کو اسلام آباد میں زیر تعمیر منصوبوں و ہسپتالوں کو چینی آنژن ہسپتال کی طرز پر سادہ، مضبوط وپائیدار بنانے کی ہدایت کرتے ہوئے کہا ہے کہ پاکستان میں زیر تعمیر ہسپتالوں میں چین کی طرز پر معیاری سہولیات کی فراہمی کو ترجیح دی جائے۔
جاری بیان کے مطابق وزیراعظم شہباز شریف نے وفاقی وزراء اسحاق ڈار، محسن نقوی، احسن اقبال، سینیٹر محمد اورنگزیب، عطاء تارڑ ودیگر اعلی افسران کے ہمراہ بیجنگ میں آنژن ہسپتال کا دورہ کیا جہاں انہیں ہسپتال میں دستیاب سہولیات بارے بریفنگ دی گی۔
وزیراعظم نے ہسپتال میں دستیاب صحت سہولیات ، موثر انتظام کیلئے موجود روبوٹس و دیگر جدید ٹیکنالوجی کی سہولیات کا معائنہ کیا اور جدید ٹیکنالوجی و بہترین خدمات کی فراہمی کو سراہا۔
وزیراعظم نے وزیرداخلہ محسن نقوی اور وزارت صحت کو اسلام آباد میں زیر تعمیر منصوبوں اور جناح میڈیکل کمپلیکس سمیت دیگر ہسپتالوں میں آنژن ہسپتال کی طرز پر سادہ، مضبوط اور پائیدار انفراسٹرکچر قائم کرنے کی ہدایت کرتے ہوئے کہا کہ پاکستان میں زیر تعمیر ہسپتالوں میں چین کی طرز پر معیاری سہولیات کی فراہمی کو ترجیح دی جائے ۔
