اسلام آباد : وزیراعظم شہباز شریف نے کہا ہے کہ معاشی استحکام کیلئے آئی ایم ایف شرائط پوری کرنے کیلئے اقدامات جاری ہیں، محصولات مد میں بدعنوانی کا خاتمہ کرنا ہوگا، سفرکٹھن اور مشکل ضرور، ناممکن نہیں، یقین ہے منزل پر پہنچیں گے۔
تفصیلات کے مطابق وفاقی کابینہ اجلاس سے خطاب کرتے ہوئے وزیراعظم شہباز شریف نے کہا ہے کہ سب مل کر محنت کر رہے ہیں، مہنگائی کا بوجھ آہستہ آہستہ کم ہورہا ہے،گزشتہ سال اگست میں مہنگائی کی شرح 27 فیصد کے قریب تھی جو رواں سال اگست میں سنگل ڈیجٹ میں آگئی ہے جس پر وزارت خزانہ،اسٹیٹ بینک اورمتعلقہ وزارتیں تعریف کے لائق ہیں۔ انہوں نے کہاکہ سفر طویل ہے، ہم نے تیزی سے آگے بڑھنا ہے، ہمیں معیشت میں مزید استحکام اور بہتری لانی ہے، اہداف کے حصول پر توجہ مرکوز ہے، روزگار کے مؤثر مواقع پیدا کرنا ہماری ترجیح ہے۔
انہوں نے کہاکہ ملک میں وسائل کی کمی نہیں، معدنیات اور قدرتی وسائل موجود ہیں، اخراجات کم کرنے کی پالیسی پر عملدرآمد یقینی بنانا ہے، رائٹ اور ڈاؤن سائزنگ کیساتھ گردشی قرضے بھی کم کرنا ہیں، محصولات کی مد میں بدعنوانی،سمگلنگ کا خاتمہ کرنا ہے، یہ سفر کٹھن اور مشکل ضرور ہے لیکن ناممکن نہیں، پورا یقین ہے اپنی منزل تک پہنچیں گے، اپنے اہداف پر فوکس رہنا ہوگا۔
انہوں نے کہا کہ عملی بصیرت پر ہماری کمٹمنٹ باتوں، پیپر اور سمری سے زیادہ ہونی چاہئے۔ انہوں نے کہا کہ دن رات محنت کرنے والی قوموں نے اپنے حالات بہتر کرلئے ہیں، پاکستانی قوم خصوصا نوجوان باصلاحیت ہیں، پاکستان کے کروڑوں لوگ بہت قابل ہیں، یہاں کسی چیز کی کمی نہیں، معدنیات، قدرتی وسائل ہیں۔
انہوں نے کہا کہ معیشت کے استحکام کیلئے آئی ایم ایف پروگرام کی شرائط پوری کرنے کیلئے اقدامات کررہے ہیں،امید ہے تمام شرائط وقت پر پوری ہوجائیں گی اور ہمارا کیس بورڈ میں جائے گا۔ انہوں نے کہا کہ آئی ایم ایف پروگرام کی منظوری کے بعد ایک نیا سفر شروع ہوگا،ہمیں یہ بات بھی ذہن میں رکھنی چاہئے کہ یہ پاکستان کی تاریخ کا آخری آئی ایم ایف پروگرام ہونا چاہئے۔
