ماسکو (شِنہوا) روس کے وزیر خارجہ سرگئی لاروف نے کہا ہے کہ جاپان کی تیزی سے دوبارہ عسکریت پسندی اختیار کرنے کی پالیسی ایشیا-بحرالکاہل کے امن و استحکام کے لئے خطرہ ہے۔
سال 2025 میں روسی سفارت کاری کے نتائج کا جائزہ لینے کے حوالے سے پریس کانفرنس سے خطاب کرتے ہوئے انہوں نے کہا کہ جاپان کے امن پسند آئینی پابندیوں کے خاتمے، فوجی اخراجات میں اضافے، جارحانہ عسکری صلاحیتوں میں توسیع اور امریکہ اور اس کے اتحادیوں کے ساتھ دفاعی تعلقات کو گہرا کرنے کے اقدامات ایشیا-بحرالکاہل کے استحکام کے لئے خطرہ ہیں اور ایشیا-بحرالکاہل میں جاپان پر اعتماد کو مجروح کر رہے ہیں۔
انہوں نے کہا کہ روس اور چین جنگ عظیم دوم کے متعلق تاریخی حقائق کا بدستور دفاع کرتے رہیں گے اور تاریخ کو مسخ کرنے اور عسکری انتقام پسندانہ رجحانات کو بحال کرنے کی کوششوں کی مشترکہ طور پر مخالفت کریں گے۔
انہوں نے زور دیا کہ جاپان کو اپنے ماضی سے سبق سیکھنا چاہیے اور 20 ویں صدی کے وسط کی مجرمانہ پالیسیوں سے خود کو دور رکھنا چاہیے، جن کی وجہ سے دنیا بھر کے عوام اور خود جاپان کے لئے بھی مشکلات پیدا ہوئیں۔
