سپیکر قومی اسمبلی سردار ایاز صادق نے پارلیمانی جماعتوں کی جوڈیشل کمیشن میں نامزدگی کرتے ہوئے سپریم جوڈیشل کمیشن کو خط لکھ دیا۔قومی اسمبلی سیکرٹریٹ کے مطابق سپیکر قومی اسمبلی سردار ایاز صادق نے اعلی عدلیہ میں ججز تقرری کیلئے جوڈیشل کمیشن کی تشکیل معاملے پر سپریم جوڈیشل کمیشن کو خط لکھ دیاہے۔ سیکرٹریٹ کے مطابق جوڈیشل کمیشن کیلئے قومی اسمبلی سے اپوزیشن لیڈر عمر ایوب اور مسلم لیگ (ن) کے شیخ آفتاب کو نامزد کیا گیاہے جبکہ خاتون کی نشست پر روشن خورشید بروچہ کی نامزدگی کئی گئی ہے۔ترجمان قومی اسمبلی کے مطابق تمام نامزدگیاں سیکرٹری جوڈیشل کمیشن کو بھجوا دی گئی ہیں، 26ویں ترمیم کی منظوری کے بعد جوڈیشل کمیشن میں 5اراکین پارلیمنٹ شامل ہیں۔
ترجمان نے بتایا کہ پارلیمنٹ سے بھجوائے گئے ناموں میں حکومت اپوزیشن کی برابر کی نمائندگی ہے، تمام نامزدگیاں سپریم کورٹ کو موصول ہو گئی ہیں۔دوسری جانب چیئرمین سینیٹ سید یوسف رضا گیلانی نے بھی آئین کے آرٹیکل 175اے کے تحت قائد ایوان سینیٹر اسحاق ڈار اور قائد حزب اختلاف سینیٹ سینٹر شبلی فراز کی ایڈوائس پر جوڈیشل کمیشن کیلئے حکومتی اور اپوزیشن بنچوں سے سینیٹر فاروق ایچ نائیک اور شبلی فراز کے نام رجسٹرار سپریم کورٹ کو ارسال کرنے کی ہدایت کر دی ہے۔
