میلبرن: آسٹریلوی فاسٹ بولر مچل سٹارک نے ٹی 20 انٹرنیشنل سے فوری طور پر ریٹائرمنٹ کا اعلان کر تے ہوئے کہا ہے کہ ٹیسٹ کرکٹ میری ہمیشہ سے سب سے اہم ترجیح رہی ہے، میں نے آسٹریلیا کے لیے کھیلے گئے ہر ایک ٹی 20 میچ کو انجوائے کیا، 2021 کا ٹی 20 ورلڈ کپ جیتنا خاص لمحہ تھا۔
کرکٹ آسٹریلیا کے مطابق مچل سٹارک نے ٹیسٹ اور ون ڈے پر فوکس کے لیے ٹی 20 انٹرنیشنل سے ریٹائرمنٹ کا فیصلہ کیا۔ 35 سالہ فاسٹ بولر جو پچھلے سال ٹی 20 ورلڈ کپ کے بعد سے کوئی ٹی 20 انٹرنیشنل میچ نہیں کھیلے اب آسٹریلیا کو صرف ٹیسٹ اور ون ڈے میچز کے لیے دستیاب ہوں گے، اس کے علاوہ سٹارک ڈومیسٹک ٹی 20 لیگز بشمول انڈین پریمیئر لیگ میں بھی شرکت کرتے رہیں گے۔
واضح رہے کہ مچل سٹارک نے آسٹریلیا کیلئے 65 ٹی 20 انٹرنیشنل میچز کھیلے جس میں انہوں نے 79 وکٹیں حاصل کیں۔
