لاہور: ڈی جی پی ڈی ایم اے پنجاب عرفان علی کاٹھیا نے سیلابی پانی بڑھنے کے پیش نظر ملتان کے ہیڈمحمد والا میں شگاف لگانے کا عندیہ دیتے ہوئے بتایا ہے کہ بارشوں، سیلا ب سے مختلف حادثات میں 14 افراد جاں بحق ہوچکے ہیں جبکہ 10لاکھ سے زائد افراد کو محفوظ مقامات پر منتقل کیا گیا ہے۔
لاہور میں پریس کانفرنس کرتے ہوئے عرفان علی کاٹھیا نے بتایا کہ بھارت کی جانب سے دریائے ستلج میں مزید پانی چھوڑا گیا ہے جس کا ریلا مسلسل آگے بڑھ رہا ہے، حالیہ بارشوں کے باعث ریسکیو آپریشن متاثر ہوا ہے جبکہ سب سے زیادہ خطرہ آج رات ملتان میں ہے۔
انہوں نے کہا کہ بھارت کی جانب سے مزید پانی چھوڑے جانے کے بعد دریائے چناب کا بڑا ریلا ہیڈ تریموں سے نکل کر آج رات ملتان پہنچے گا جبکہ ہیڈ سنگنائی پر پانی کی سطح تیزی سے بڑھ رہی ہے جس سے پیر محل اور خانیوال متاثر ہو سکتے ہیں۔
انہوں نے کہا کہ پانی بڑھا تو ملتان کے محمد والا پر پانی زیادہ بڑھا تو شگاف لگانا پڑے گا تاہم ہیڈ بلوکی پر پانی کی سطح فی الحال برقرار ہے۔ انہوںنے بتایا کہ پنجاب کی تاریخ کا سب سے بڑا ریسکیو آپریشن جاری ہے، جس میں فوج، ریسکیو 1122، سرکاری ادارے اور نجی تنظیمیں شریک ہیں۔ بارشوں کے باعث ریسکیو سرگرمیاں متاثر ہوئیں تاہم وزیر اعلی پنجاب کی ہدایت پر متاثرہ خاندانوں کو خوراک اور امداد فراہم کی جا رہی ہے۔
انہوں نے بتایا کہ 26 اگست سے اب تک مختلف حادثات میں 41 افراد جاں بحق ہوچکے ہیں جبکہ اب تک 10 لاکھ سے زائد افراد کو محفوظ مقامات پر منتقل کیا جاچکا ہے۔ ریلیف کمشنر پنجاب نبیل جاوید نے بتایا کہ اب تک 3200سے زائد دیہات اور 24لاکھ سے زیادہ افراد متاثر ہوئے ہیں، متاثرہ علاقوں میں 395 ریلیف کیمپس، 392 میڈیکل کیمپس اور 336ویٹرنری کیمپس قائم کیے جا چکے ہیں، اب تک 10 لاکھ افراد اور 7لاکھ 8 ہزار سے زائد مویشیوں کو محفوظ مقامات پر منتقل کیا گیا ہے۔
انہوں نے بتایا کہ منگلا ڈیم 82فیصد جبکہ تربیلا ڈیم 100فیصد بھر چکا ہے، اسی طرح بھارت کے بھاکڑا ڈیم میں 84فیصد، پونگ ڈیم میں 98فیصد اور تھیئن ڈیم میں 92فیصد پانی بھرنے کی اطلاع ہے، یہ صورتحال خطرے میں مزید اضافے کا باعث بن سکتی ہے۔
ترجمان پی ڈی ایم اے کے مطابق گزشتہ 24 گھنٹوں میں پنجاب کے مختلف اضلاع میں بارش ریکارڈ کی گئی جن میں نارووال میں سب سے زیادہ 77ملی میٹر جبکہ لاہور میں 21اور راولپنڈی میں 64 ملی میٹر بارش شامل ہے۔
حکام نے دریائوں کے قریب رہنے والے شہریوں کو فوری انخلا کی ہدایت کرتے ہوئے کہا ہے کہ متاثرین کے نقصانات کا ازالہ یقینی بنایا جائے گا۔
