لاہور: امیر جماعت اسلامی حافظ نعیم الرحمن نے کہا ہے کہ موجودہ نظام میں طاقتوروں، حکمرانوں کی بالادستی ہے، وسائل کا صحیح استعمال نہ ہونے پر نوجوانوں میں مایوسی پھیلتی ہے، اداروں کے اپنی ناکامی تسلیم نہ کرنے تک ملک میں بہتری نہیں آئے گی، نوجوان جماعت اسلامی کی ممبر شپ مہم میں حصہ لیں۔
تفصیلات کے مطابق منصورہ میں پریس کانفرنس کرتے ہوئے امیر جماعت اسلامی حافظ نعیم الرحمن نے کہا کہ ملک کے موجودہ حالات پارلیمنٹ، اسٹیبلشمنٹ،عدلیہ اور ملٹری کی ناکامی ہے، ادارے جب تک اپنی ناکامی تسلیم نہیں کریں گے بہتری نہیں آئے گی۔
انہوں نے کہا کہ حکومت نے آئی پی پیز کو انکم ٹیکس میں 13 سو ارب کی چھوٹ دی ہوئی ہے اس کا ٹیکس معاف مگر غریب آدمی ٹیکس دیتا ہے۔ انہوں نے کہا کہ آئی ایم ایف کی غلامی میں جانیوالا مستحکم نہیں ہوسکتا۔
انہوں نے کہاکہ جماعت اسلامی فرشتہ نہیں، غلطیاں اور کوتاہیاں کرسکتے ہیں لیکن ہم سب مل کر جدوجہد کریں گے۔ انہوں نے کہا کہ رواں ماہ 50 لاکھ افراد کو جماعت اسلامی کا ممبر بنائیں گے،پورے پاکستان میں کمیٹیاں قائم کی جائیں گی۔
انہوں نے کہا کہ جماعت اسلامی اس وقت پاکستان کی موثر ترین جماعت ہے، جماعت اسلامی ہی جمہوریت کے پیمانے پر پورا اترنے اور سب کو جوڑنے والی جماعت ہے، باقی وڈیروں،جاگیرداروں اور خاندانوں پر مشتمل پارٹیاں ہیں۔
انہوں نے کہا کہ پاکستان انشااللہ قائم رہے گا اور جماعت اسلامی اپنا کردار ادا کرے گی۔انہوں نے کہا کہ موجودہ نظام میں طاقتوروں ،دولت والوں اور حکمرانوں کی بالادستی ہے، جب وسائل لوگوں پر نہیں لگتے تو نوجوانوں میں مایوسی پھیلتی ہے، پاکستان میں 80فیصد لوگ 40سال اور 65فیصد 25سال کی عمر کے ہیں، آپ نے پاکستان سے مایوس ہوکر جانا ہی کیوں ہے؟۔
انہوں نے کہا کہ پاکستان میں معدنی ذخائر کی کوئی کمی نہیں، سمندر،دریا ، کھیت اور پہاڑ ہیں تاہم نظام پر قابض لیڈر شپ نے نوجوانوں کو مایوس کیا ہے، لوگ یہاں طاقت کے بل بوتے ، فارم 47پر مسلط ہوتے ہیں، یہ لوگ صحیح طریقے سے پاکستان نہیں چلا سکے، ان کو اپنی شکست اور ناکامی کو تسلیم کرنا ہوگا، ہم نوجوانوں کے ساتھ مل کر حکمران طبقے کو ناکامی کا اعتراف کرنے پر مجبور کریں گے۔
انہوں نے کہا کہ ہم کسی فرقے کی بنیاد پر نہیں ، ہر مسلک کا احترام کرتے ہیں، ہم خواتین میں سب سے زیادہ منظم اور بہترین طریقے سے خدمت کررہے ہیں، ہم نے لوگوں کو حقوق دلانے کی بات کی ہے،نوجوانوں سے کہتا ہوں جماعت اسلامی کی ممبر شپ مہم میں حصہ لیں۔
انہوں نے کہا کہ میڈیا ورکرز کو وہ مراعات ملنی چاہئیں جو آئین وقانون کے مطابق ہیں، میڈیامالکان سے مطالبہ ہے کہ وہ ہر طرح کے حالات میں کام کرنیوالے اپنے کارکنان کو ان کے حقوق دیں۔
