راولپنڈی: یوم آزادی کی مناسبت سے آئی ایس پی آر نے جوش و جذبے سے بھرپور نیا ملی نغمہ”دل سے پاکستان”جاری کر دیا۔ آئی ایس پی آر کے مطابق یہ نغمہ معرکہ حق میں عظیم فتح کی یادگار کے طور پر پیش کیا گیا ہے، اس میں وطن کیلئے جان نثار کرنے والے شہدا کو خراج عقیدت پیش کرتے ہوئے ان کی لازوال قربانیوں کو سنہری الفاظ میں سراہا گیا ہے۔
بیان کے مطابق نغمہ قوم کے جذبہ حب الوطنی، اتحاد اور وطن کی حفاظت کے عزم کی عکاسی کرتا ہے۔نغمے میں بھارت کے خلاف تاریخی معرکوں میں کامیابی اور قوم کی استقامت کو جوش و خروش سے پیش کیا گیا ہے جبکہ وطن کی بقا، خودمختاری اور سلامتی کے لیے ہر قربانی دینے کے عزم کا اظہار بھی شامل ہے۔
آئی ایس پی آر کے مطابق نغمے کے ذریعے مادرِ وطن کے محافظ، افواجِ پاکستان کے جذبے، کردار اور قربانیوں کو بھرپور انداز میں خراجِ تحسین پیش کیا گیا ہے، نغمہ قومی یکجہتی، ترقی اور استحکام کے نئے عہد کی تجدید کا مظہر بھی ہے۔
