راولپنڈی: ہر موسم میں ہدف کو نشانہ بنانے کی صلاحیت کے حامل Z-10ME اٹیک ہیلی کاپٹرز کی بری فوج میں شمولیت سے پاک فوج کی جنگی صلاحیت میں مزید اضافہ ہوگیا جبکہ فیلڈ مارشل عاصم منیر نے قومی یکجہتی، سول ملٹری ہم آہنگی اور ہائبرڈ خطرات کے مقابلے کیلئے پوری قوم کی شراکت داری کی اہمیت پر زور دیتے ہوئے قومی خودمختاری و علاقائی سالمیت کے تحفظ کیلئے پاک فوج کے غیرمتزلزل عزم کا اعادہ کیا ہے۔
آئی ایس پی آر کے مطابق فیلڈ مارشل سید عاصم منیر نشانِ امتیاز (ملٹری) نے ملتان گیریژن کا دورہ کیاجہاں کور کمانڈر ملتان نے ان کا گرمجوشی سے استقبال کیا۔بیان کے مطابق کور ہیڈکوارٹرز میں فیلڈ مارشل کو فارمیشن کی آپریشنل تیاریوں اور جاری تربیتی سرگرمیوں پر بریفنگ دی گئی۔فیلڈ مارشل نے تیاریوں کے اعلی معیار پر اطمینان کا اظہار کیا اور قومی خودمختاری و علاقائی سالمیت کے تحفظ کیلئے پاک فوج کے غیرمتزلزل عزم کا اعادہ کیا۔بعد ازاں آرمی چیف نے اکیڈیمیا اور سول سوسائٹی کے افراد سے انٹرایکٹیو سیشن میں ملاقات کی، جس میں انہوں نے قومی یکجہتی، سول ملٹری ہم آہنگی اور ہائبرڈ خطرات کا مقابلہ کرنے کیلئے پوری قوم کی شراکت داری کی اہمیت پر زور دیا۔
اس موقع پر فیلڈ مارشل نے پاکستان آرمی ایوی ایشن میں جدید Z-10ME اٹیک ہیلی کاپٹر کی شمولیت کی تقریب کی صدارت بھی کی۔ یہ جدید ترین آل ویدر پلیٹ فارم دن رات درست نشانہ لگانے کی صلاحیت رکھتا ہے، جدید ریڈار اور الیکٹرانک وارفیئر سسٹمز سے لیس یہ ہیلی کاپٹر فضائی اور زمینی خطرات سے نمٹنے کی صلاحیت میں نمایاں اضافہ کرتا ہے۔
آئی ایس پی آر کے مطابق بعد ازاں آرمی چیف نے مظفرگڑھ فیلڈ فائرنگ رینج میں نئے شامل کردہ Z-10MEہیلی کاپٹرز کی فائر پاور کا عملی مظاہرہ بھی دیکھا، اس طاقتور نظام کی شمولیت آرمی ایوی ایشن کی جدیدیت میں ایک اہم سنگ میل ہے، جو میدانِ جنگ میں فوری اور فیصلہ کن ردِعمل دینے کی صلاحیت کو مزید مضبوط کرتا ہے۔
دورے کے دوران سپاہیوں سے بات چیت کرتے ہوئے آرمی چیف نے ان کے بلند حوصلے، پیشہ ورانہ مہارت اور جنگی تیاریوں کو سراہا اور مشترکہ جنگی حکمت عملی کے کامیاب مظاہرے کی تعریف کرتے ہوئے بدلتے ہوئے جنگی حالات میں برتری قائم رکھنے کے فوج کے عزم کو اجاگر کیا۔
