اسلام آباد: وفاقی دارالحکومت سمیت پنجاب، خیبر پختونخوا، آزاد کشمیر اور گلگت بلتستان کے مختلف علاقوں میں.4 5شدت زلزلے کے شدید جھٹکے محسوس کئے گئے جس کے باعث شہری خوف و ہراس کا شکار ہو کر کلمہ طیبہ کا ورد کرتے گھروں سے باہر نکل آئے۔
زلزلہ پیما مرکز کے مطابق زلزلے کی گہرائی122کلو میٹر ریکارڈ کی گئی جبکہ مرکز ہندوکش ریجن افغانستان تھا، زلزلے کا مرکز باجوڑ سے 102کلومیٹر دور ریکارڈ کیا گیا ہے ۔
ذرائع کے مطابق زلزلے کے جھٹکے لاہور، راولپنڈی، اسلام آباد، پشاور، ہری پور، ایبٹ آباد، چارسدہ، سوات ،مینگورہ، ہزارہ ڈویژن، گلگت بلتستان اور آزاد کشمیر کے علاقوں ہٹیاں بالا، جہلم ویلی، چناری ودیگر علاقوں سمیت افغانستان اور تاجکستان میں بھی محسوس کئے گئے۔ حکام کے مطابق زلزلے سے کسی جانی یا مالی نقصان کی اطلاعات موصول نہیں ہوئیں۔
