وزیراعظم شہباز شریف نے گلگت بلتستان کے یوم آزادی پر خطے کے عوام اور قوم کو مبارکباد دیتے ہوئے کہا ہے کہ گلگت بلتستان کی ترقی، خوشحالی، نوجوانوں کے بہتر مستقبل کیلئے پرعزم ہے، سیاحت، توانائی، بنیادی ڈھانچے اور تعلیمی شعبوں میں جاری منصوبے علاقے کی ترقی میں سنگ میل ثابت ہوں گے۔
گلگت بلتستان کے یو م آزادی پر جاری بیان میں وزیراعظم نے کہا کہ یکم نومبر 1947ء کو گلگت بلتستان کے بہادر عوام نے جرات، اتحاد اور حب الوطنی کا مظاہرہ کیا اور ڈوگرہ راج سے آزادی حاصل کر کے پاکستان کیساتھ الحاق کا تاریخی فیصلہ کیا، یہ دن اس عظیم قربانی، عزم اور وطن سے محبت کی یاد دلاتا ہے جس نے خطے کی تاریخ بدل دی۔
انہوں نے کہا کہ وفاقی حکومت گلگت بلتستان کی ترقی، خوشحالی اور نوجوانوں کے بہتر مستقبل کیلئے پرعزم ہے، سیاحت، توانائی، بنیادی ڈھانچے اور تعلیم کے شعبوں میں جاری منصوبے علاقے کی ترقی میں سنگ میل ثابت ہوں گے۔
انہوں نے کہا کہ گلگت بلتستان کے عوام کو ترقی کے تمام مواقع فراہم کئے جائیں گے تاکہ وہ قومی دھارے میں بھرپور کردار ادا کر سکیں۔
انہوں نے کہا کہ یہ دن تجدید کا پیغام دیتا ہے کہ ہم اپنی آزادی، اتحاد اور ترقی کے سفر کو نئی توانائی اور جذبے کے ساتھ جاری رکھیں گے۔
دعاء ہے ک اللہ تعالی گلگت بلتستان اور پاکستان کو امن، ترقی اور خوشحالی سے نوازے۔آمین
