نائب وزیراعظم و وزیر خارجہ اسحاق ڈار نے پاکستان کے سفارتی اثر و رسوخ کو مزید مضبوط اور ادارہ جاتی کارکردگی کو موثر بنانے پر زور دیا۔
دفتر خارجہ سے جاری بیان کے مطابق وزارتِ خارجہ میں نائب وزیراعظم و وزیر خارجہ اسحاق ڈار کی زیر صدارت اعلی سطح کا بین الوزارتی کمیٹی کا اجلاس ہوا جس میں وفاقی وزیر پیٹرولیم، وزیر مملکت ریلوے، چیئرمین خارجہ امور کمیٹی قومی اسمبلی، وزیراعظم کے معاون خصوصی طارق باجوہ، سیکرٹری خارجہ آمنہ بلوچ، سیکرٹری کابینہ، اسٹیبلشمنٹ ڈویژن، تجارت، داخلہ، انسانی وسائل و ترقی، اقتصادی امور ڈویژن کے سیکرٹریز سمیت وزارتِ خزانہ، اطلاعات اور دیگر متعلقہ محکموں کے سینئر حکام نے شرکت کی۔
اجلاس میں حکومت کی کارکردگی، بالخصوص بیرونِ ملک پاکستان مشنز کے امور کا جائزہ لیا گیا۔
اجلاس میں کمیٹی کی جانب سے رپورٹ بھی پیش کی گئی جبکہ نائب وزیراعظم نے پاکستان کے سفارتی اثر و رسوخ کو مزید مضبوط بنانے، مشنز کی کارکردگی کو قومی اسٹریٹجک اہداف کے ساتھ ہم آہنگ کرنے اور بیرونِ ملک ادارہ جاتی کارکردگی کو بہتر ہم آہنگی و تعاون کے ذریعے مزید موثر بنانے پر زور دیا۔
