وزیر اطلاعات پنجاب عظمی بخاری نے کہا ہے کہ وزیراعلی مریم نواز پنجاب کے نظام کو حقیقت میں ”ریاست ہو گی ماں کے جیسی ” کے تصور پر استوار کر رہی ہیں جہاں عوام کے حقوق کا تحفظ، انصاف کی فراہمی اور کمزور طبقے کی مدد حکومت کی اولین ترجیح ہے۔
جاری بیان میں عظمی بخاری نے کہا کہ پنجاب میں غریب و کمزور طبقے کی زمینوں پر قبضے کا مستقل خاتمہ کر دیا گیا ہے، نئے پراپرٹی آرڈیننس کی منظوری سے قبضہ مافیا کا راستہ ہمیشہ کیلئے رک گیا ہے۔
انہوں نے کہا کہ ماضی میں 40، 40سال تک زمینوں پر قبضے کے مقدمات عدالتوں میں چلتے رہتے تھے مگر فیصلے نہیں آتے تھے، اب آرڈیننس کے تحت ہر کیس کا فیصلہ 90روز میں یقینی بنایا جائے گا۔
انہوں نے کہا کہ پنجاب میں کسی کو غیر قانونی سرگرمیوں، اسلحے کی نمائش یا شہریوں میں خوف و ہراس پھیلانے کی اجازت نہیں دی جائے گی، مریم نواز کی قیادت میں پنجاب میں ترقی اور گورننس کا جو نیا رجحان متعارف کروایا گیا ہے، وہ اب دیگر صوبوں کیلئے رول ماڈل بن چکا ہے۔
انہوں نے کہا کہ مریم نواز پنجاب کے عوام کا معیارِ زندگی بہتر بنانے کیلئے روزانہ نئے ترقیاتی منصوبے شروع کر رہی ہیں ،منصوبوں میں وسائل کا درست استعمال، میرٹ اور شفافیت حکومت کی پہچان بن چکے ہیں۔
انہوں نے کہا ہے کہ مریم نواز پنجاب کے نظام کو حقیقت میں ”ریاست ہو گی ماں کے جیسی”کے تصور پر استوار کر رہی ہیں جہاں عوام کے حقوق کا تحفظ، انصاف کی فراہمی اور کمزور طبقے کی مدد حکومت کی اولین ترجیح ہے۔
