اے این ایف نے 5 مختلف کارروائیوں میں 5 ملزمان گرفتار کر کے ایک کروڑ 12 لاکھ روپے سے زائد مالیت کی 108.61 کلو گرام منشیات برآمد کرلی۔
ترجمان کے مطابق نارتھ ناظم آباد کراچی میں واقع یونیورسٹی کے قریب ملزم سے 36کلو چرس برآمد کی گئی، گرفتار ملزم نے تعلیمی اداروں کے طلبہ کو منشیات فروخت کرنے کا اعتراف بھی کیا ہے۔
اسلام آباد ایئرپورٹ پر دبئی جانیوالے مسافر کے سامان میں آٹا گوندھنے والی مشین سے منشیات 1.726کلو آئس اور 0.218کلوگرام وزنی 480ایکسٹیسی گولیاں برآمد ہوئیں۔
ترجمان کے مطابق گلبرگ لاہور میں واقع کوریئر آفس میں دبئی بھیجے جانے والے پارسل میں جوتوں میں چھپائی گئی 70گرام چرس برآمد ہوئی۔
سہراب گوٹھ کراچی میں بس ٹرمینل کے قریب گاڑی سے 45.6 کلوگرام چرس برآمد کرکے ملزم کو گرفتار کرلیا گیا جبکہ شیر شاہ ٹول پلازہ ملتان کے قریب گاڑی سے 25 کلو افیون برآمد کر کے 2 ملزمان کو گرفتار کیا گیا۔
ترجمان کے مطابق تمام کارروائیوں میں انسداد منشیات ایکٹ 1997ء کے تحت مقدمات درج کر کے تحقیقات شروع کردی گئی ہیں۔
