لاہور: سابق اولمپئن توقیر ڈار نے کہا ہے کہ کرکٹ ٹیم کے لیے چیمپئنز ٹرافی اور ورلڈ کپ کھیلنا ضروری ہے اسی طرح پرو ہاکی لیگ ضروری ہے۔ایک بیان میں انہوں نے کہا کہ پاکستان ہاکی ٹیم اس وقت ورلڈ کپ اور اولمپکس میں شامل نہیں ہے، اب پرو ہاکی لیگ کا موقع ملا ہے، نیوزی لینڈ کے دستبردار ہونے سے جو موقع ملا ہے وہ بہت بڑا ہے۔
انہوں نے مزید کہا کہ چند سال پہلے ہم پرو لیگ سے دستبردار ہوئے، بھارت نے جگہ لی اب وہ دو اولمپک براونز میڈل جیتا ہوا ہے، جن لوگوں نے پرو لیگ سے دستبرداری کا فیصلہ کیا وہ بھی مجرم ہیں، ان کے خلاف کوئی کارروائی نہیں کی گئی۔
توقیر ڈار کا کہنا تھا کہ ہاکی کے لیے نہ ہی ڈومیسٹک سطح پر کچھ ہو رہا ہے اور نہ ہی انٹرنیشنل سطح پر اس لیے یہ ہمارے کھلاڑیوں کے لیے بہت بڑی کامیابی ہے کہ وہ ٹاپ کی ٹیموں کے خلاف پورا سال کھیلیں گے۔
ان کا یہ بھی کہنا تھا کہ اللہ نے اب ہمیں دوسرا موقع دیا، اس سے بھرپور فائدہ اٹھانا چاہیے، حکومت کو چھوڑیں میں تو کہتا ہوں محسن نقوی ہی ہاکی کو بھی سپورٹ کریں، پیسہ دیں تاکہ ہاکی ٹیم پرو لیگ میں شرکت کرے۔
