چین کے سائبر سپیس کے نگران ادارے نے امریکی ٹیکنالوجی کمپنی این ویڈیاکو چین کو فروخت کردہ ایچ 20 اے آئی چِپ میں سکیورٹی خدشات پر طلبی کا نوٹس جاری کیاہے۔ کمپنی سے کہا گیا ہے کہ وہ ان خدشات پر وضاحت پیش کرے اور اس سلسلے میں متعلقہ ثبوت جمع کروائے۔(شِنہوا)
بیجنگ(شِنہوا)چین کے سائبر سپیس کے نگران ادارے نے امریکی ٹیکنالوجی کمپنی این ویڈیا کو چین کو فروخت کردہ اس کی ایچ 20 اے آئی چپ میں سکیورٹی خدشات کے سلسلے میں طلب کرلیا ہے۔
چین کی سائبر سپیس انتظامیہ (سی اے سی) کے مطابق کمپنی سے کہا گیا ہے کہ وہ اس معاملے کے بارے میں وضاحت پیش کرے اور اس حوالے سے ثبوت اور متعلقہ مواد فراہم کرے۔ اس اقدام کا مقصد چین کے انٹرنیٹ، ڈیٹا سکیورٹی اور شخصی معلومات کے تحفظ سے متعلق قوانین کے تحت چینی صارفین کے سائبر سپیس اور ڈیٹا سکیورٹی کا تحفظ کرناہے۔
حال ہی میں این ویڈیا کی مصنوعی ذہانت چپس پر سنگین سکیورٹی خدشات کے الزامات عائد کئے گئے ہیں جبکہ بعض امریکی قانون سازوں نے مطالبہ کیا ہے کہ بیرون ملک برآمد کی جانے والی جدید چپس میں ٹریکنگ اور پوزیشننگ کی خصوصیات شامل کی جائیں۔
سی اے سی کے بیان کے مطابق امریکی مصنوعی ذہانت کے ماہرین نے انکشاف کیا ہے کہ این ویڈیا چپس کی ٹریکنگ اور پوزیشننگ اور ریموٹ شٹ ڈاؤن ٹیکنالوجی پختگی کی سطح پر پہنچ چکی ہے۔
