اسلام آباد: مسلم لیگ (ن) کے سینئر رہنماء و سینیٹ میں پارلیمانی لیڈر سینیٹر عرفان صدیقی نے کہا ہے کہ حکومتی اقدامات فلسطینی عوام سے یکجہتی کا مظہر ہیں، دنیا نے پہلگام بارے بھارتی موقف مسترد کر دیا، موثر سفارتکاری کی بدولت دشمن بے نقاب ہوگیا ہے۔
جمعرات کو سیکرٹری وزارت خارجہ آمنہ بلوچ نے سینیٹر عرفان صدیقی سے ان کے دفتر میں ملاقات کی اور پاک بھارت جنگ کے تناظر میں عالمی سطح پر پاکستانی موقف کو اجاگر کرنے کی تفصیل سے آگاہ کیا۔
سیکریٹری خارجہ نے سیاسی و سفارتی سطح پر فلسطین کا مقدمہ پیش کرنے کیلئے نائب وزیراعظم و وزیر خارجہ سینیٹر اسحاق ڈار کے حالیہ دوروں کی تفصیل سے بھی عرفان صدیقی کو آگاہ کیا جبکہ غزہ کے متاثرہ عوام کیلئے خوراک اور دیگر سامان کی ترسیل بارے پاکستانی کوششوں کے بارے میں بھی بتایا۔
سینیٹر عرفان صدیقی نے وزارت خارجہ کی کوششوں کو سراہتے ہوئے کہا کہ ہماری موثر اور کامیاب سفارت کاری نے بھارت کو بے نقاب کر دیا ہے، دنیا کے کسی ملک نے پہلگام کے بارے میں اس کے جھوٹے موقف کو تسلیم نہیں کیا۔
انہوں نے کہا کہ اس وقت غزہ کے عوام کو شدید غذائی قلت کا سامنا ہے، اس سلسلے میں حکومت پاکستان کے اقدامات عوامی امنگوں کی ترجمانی کرتے ہیں۔
