جنیوا: پاکستان اور ایران نے دوطرفہ پارلیمانی تعلقات کو مزید مستحکم بنانے پر اتفاق کیا ہے۔ جاری بیان کے مطابق جنیوا میں 6ویں عالمی سپیکرز کانفرنس کی سائیڈ لائن پر سپیکر سردار ایاز صادق نے ایرانی ہم منصب ڈاکٹر محمد باقر قالیباف سے ملاقات کی ملاقات کی جس میں دونوں رہنمائوں نے دو طرفہ پارلیمانی تعلقات کو مزید مستحکم بنانے پر اتفاق کیا۔
سپیکر نے کہا کہ پاکستان اور ایران کے مابین تاریخی برادرانہ و دوستانہ تعلقات پائے جاتے ہیں۔ انہوں نے کہا کہ مشرق وسطی میں پائیدار امن خطے کی ترقی اور خوشحالی کیلئے ناگزیر ہے، ایران پر اسرائیلی حملہ عالمی قوانین کی صریحا خلاف ورزی ہے۔
انہوں نے کہا کہ پاکستان تمام عالمی تنازعات کا مذاکرات کے ذریعے پرامن حل کا خواہاں اور ایران کی خودمختاری اور سالمیت کی بھرپور حمایت کرتا ہے اور پاکستانی پارلیمان نے ایران پر اسرائیلی جارحیت کے خلاف متفقہ قراردادیں منظور کیں۔۔ انہوں نے کہا کہ پاکستان ایران کے جوہری پروگرام کا مذکرات کے ذریعے پرامن حل چاہتا ہے۔
اس موقع پر ایرانی سپیکر ڈاکٹر محمد باقر قالیباف نے ایران پر اسرائیلی جارحیت کیخلاف پاکستان کی حمایت پر شکریہ ادا کرتے ہوئے کہا کہ ایران اور پاکستان کے مابین مضبوط برادرانہ اور دوستانہ تعلقات موجود ہیں۔ انہوں نے کہا کہ ایران پاکستان کے ساتھ اپنے برادرانہ تعلقات کو قدر کی نگاہ سے دیکھتا ہے، پاکستان کی پارلیمان اور عوام کی جانب سے حمایت کو ایرانی عوام ہمیشہ یاد رکھیں گے۔
