کراچی: پاکستانی ڈرامہ انڈسٹری کے سینئر اداکار بہروز سبزواری نے کہا ہے کہ میرا پورا خاندان اب شوبز کا حصہ بن چکا ہے، بیٹے شہروز سبزواری نے اداکاری کے میدان میں میرے نقشِ قدم پر چلتے ہوئے مقام بنایا ، بہو صدف کنول ماڈلنگ اور اداکاری کے شعبے میں سرگرم ہیں۔
ایک پروگرام میں گفتگو کرتے ہوئے انہوں نے کہا کہ جب بیٹا باپ کی ذمہ داریاں بانٹنے لگتا ہے، تو مرد کو اصل سکون ملتا ہے، اب شہروز ایک ذمہ دار انسان بن چکا ہے اور وہ میری بھرپور فکر کرتا ہے۔
انہوں نے مزید کہا کہ جس طرح میں اپنے والدین کی خدمت کرنے کی پوری کوشش کرتا رہا، آج مجھے یہ سکون ہے کہ میرا بیٹا بھی انہی جذبوں سے سرشار ہے۔
بہروز سبزواری نے عورتوں پر مردوں کے حاکم ہونے سے متعلق قرآن پاک کی آیت کا حوالہ دیتے ہوئے کہا کہ یہ آیت اس برتری کی بات نہیں کرتی جو ظلم کی اجازت دیتی ہو، بلکہ اِس کا مطلب ہے کہ مردوں پر زیادہ ذمہ داریاں عائد ہوتی ہیں۔
ان کا کہنا تھا کہ حقیقت میں مرد اور عورت کے حقوق برابر ہیں، لیکن معاشرہ غلط انداز میں مردوں کو تشدد کا حق دے دیتا ہے جو اسلام میں ہرگز نہیں۔
