پشاور ہائیکورٹ نے خیبرپختونخوا اسمبلی کی مخصوص نشستوں پر منتخب ممبران کو حلف لینے سے روکتے ہوئے ریمارکس دیئے ہیں کہ صوبے میں تو پی ٹی آئی حکومت ہے ان کو یہاں بھی سیٹیں نہیں ملی ۔ منگل کو پشاور ہائیکورٹ میں جسٹس سید ارشد علی اور جسٹس ڈاکٹر خورشید اقبال پر مشتمل دو رکنی بینچ نے مخصوص نشستوں بارے پی ٹی آئی ارکان اسمبلی کی دائر درخواست پر سماعت کی۔
وکیل درخواست گزار سلطان محمد خان ایڈووکیٹ نے کہا کہ الیکشن کمیشن نے مخصوص نشستوں کلکولیشن ٹھیک طریقے سے نہیں کی۔جسٹس ارشد علی نے استفسار کیا کہ آپ نے مخصوص نشستوں کیلئے فہرست جمع کی؟ وکیل درخواست گزار نے بتایا کہ جی ہم نے جمع کی ہے۔
وکیل سلطان محمد خان نے کہا کہ پی ٹی آئی پی کی صوبائی اسمبلی میں دو نشستیں ہیں، الیکشن کمیشن نے ایک خواتین کی مخصوص نشست دی ہے۔جسٹس ارشد علی نے ریمارکس دیئے کہ یہاں تو پی ٹی آئی کی حکومت ہے، ان کو یہاں بھی سیٹیں نہیں ملی۔وکیل درخواست گزار نے بتایا کہ پی ٹی آئی نے الیکشن نہیں لڑا، یہاں ان کے آزاد امیدوار تھے،
پی ٹی آئی پی کو دو اور خواتین کی نشستیں ملنی چاہئیںجبکہ اقلیتوں کی ایک نشست بھی پی ٹی آئی پی کا حق ہے، مخصوص نشستوں پر خواتین سے حلف نہ لیا جائے۔دلائل سننے کے بعد عدالت نے مخصوص نشستوں پر ممبران کو حلف لینے سے روکتے ہوئے متعلقہ حکام سے جواب طلب کرلیا اور سماعت ملتوی کردی۔
