لاہور: وزیراعلی پنجاب مریم نواز نے کہا ہے کہ پنجاب کے ہر شہری کو صحت کی بہترین سہولیات تک رسائی کی فراہمی ہمارا عزم ہے، مراکز صحت، ٹی ایچ کیوز اور ٹرشری ہسپتالوں کی اپ گریڈ یشن پر کام شروع کر دیا ہے،دل کے امراض، ٹی بی، کینسر اور ہیپاٹائٹس کی ادویات لوگوں کے گھروں تک پہنچا رہے ہیں۔
تفصیلات کے مطابق وزیراعلی پنجاب مریم نواز سے صوبائی مشیر صحت اظہر محمود کیانی نے ملاقات کی جس میں صحت کے شعبے میں اصلاحات پر تبادلہ خیال کیا گیا۔ملاقات میں اظہر کیانی نے شعبہ صحت میں ریفارمز کیلئے سفارشات پیش کیں جبکہ صحت منصوبوں کی جلد تکمیل کیلئے تمام ممکنہ اقدامات کرنے پر اتفاق ہوا۔
اس موقع پر گفتگو کرتے ہوئے وزیراعلی مریم نواز نے کہا کہ صحت کا شعبہ میرے دل کے بہت قریب ہے، شعبے میں انقلاب لانے کا تہیہ کر لیا ہے۔انہوں نے کہا کہ تمام مراکز صحت، ٹی ایچ کیوز اور ٹرشری ہسپتالوں کی اپ گریڈ یشن پر کام شروع کر دیا ہے، دل کے امراض، ٹی بی، کینسر اور ہیپاٹائٹس کی ادویات لوگوں کے گھروں میں پہنچا رہے ہیں۔
انہوں نے کہا کہ اس وقت انتہائی خوشی ہوئی جب ایک خاتون نے مجھے گھر ڈیلیور ہونے والی دل کی ادویات دکھائیں، فیلڈ ہسپتال اور کلینک آن ویلز کا منصوبہ کامیاب ترین منصوبوں میں سے ایک ہے، چند ہفتوں میں 12 لاکھ افراد کا ان کی دہلیز پر علاج ہوا ہے۔ انہوں نے کہا کہ فیلڈ ہسپتالوں میں مفت ادویات کے ساتھ ایکسرے، مفت لیب ٹیسٹ اور ای سی جی کی سہولت موجود ہے، 500مزید کلینک آن ویلز کا اضافہ کر رہے ہیں، جہاں پر ڈاکٹرز موجود نہیں وہاں ڈاکٹرز کو بھیجنے کیلئے مراعات دے رہے ہیں اب دور دراز علاقوں میں ڈاکٹرز کی کمی نہیں رہے گی۔انہوں نے کہا کہ پی ٹی آئی دور حکومت میں بند کی گئی دوائیاں دوبارہ ملنا شروع ہو چکی ہیں، سرکاری ہسپتالوں میں مریضوں کو مفت ادویات دی جا رہی ہیں۔ انہوں نے کہا کہ اضلاع میں کارڈیالوجی اور پیڈز بلاک بننے سے دیہات کے مکینوں کو شہروں کا رخ نہیں کرنا پڑے گا، موجودہ ہیلتھ انفراسٹرکچر کو مکمل طور پر پبلک فرینڈلی بنانا ضروری ہے، موجودہ سسٹم کی بحالی اور ری سٹرکچرنگ کی جائے گی۔
انہوں نے ہدایت کی کہ میڈیکل کالجز اور یونیورسٹیوں میں جدید ریسرچ کیلئے اقدامات کئے جائیں، پنجاب کے ہر شہری کو صحت کی بہترین سہولیات تک رسائی کی فراہمی ہمارا عزم ہے۔
