صدر پی ٹی آئی خیبرپختونخواجنید اکبر نے کہا ہے کہ پارٹی جلسوں ،احتجاج پر کروڑوں روپے لگا کر کمانے نہیں دوں گا، پچھلی قیادت رابطوں میں رہی ، اب لانگ مارچ ہوا تو کسی سے بات نہیں ہوگی، اختیار ملا تو ورکرز کو رلانے والوں کو نشان عبرت بنائوںگا،
شہباز شریف کے بچوںکو نہ رلایا تو پی ٹی آئی چھوڑ دوں گا۔ملاکنڈ میں تقریب سے خطاب کرتے ہوئے جنید اکبر نے کہا کہ میں گراس روٹ لیول سے آیا ہوں،مجھے کوئی پی ٹی آئی کی سیاست نہ سکھائے، بانی کو کہا تھا میری جگہ ایسے بندے کو صوبے کا صدر بنائیں جس کا وزیراعلی خیبر پختونخوا کیساتھ تعلق اچھا ہو۔ انہوں نے کہا کہ جس دن اپنی بات پر کھڑا نہ ہو سکا، اس دن پی ٹی آئی کی صدارت چھوڑ دوں گا۔ انہوں نے کہا کہ پی ٹی آئی کی تنظیم سازی کیلئے مجھے عمران خان نے کوئی ہدایت نہیں دی،ہدایات نہ ملنے تک موجودہ تنظیمیں ہی کام کریںگی ۔
انہوں نے کہا کہ پی ٹی آئی سے پیسوں کے عوض عہدے دینے کے کلچر کو ختم کروں گا، جو لوگ پارٹی کے جلسوں پر پیسے لگاتے ہیں پھر کرپشن بھی کرتے ہیں،ہم نے اس کلچر کو ختم کرنا ہے پیسے لگا کر کمائو، اب یہ نہیں چلے گا۔ انہوں نے کہا کہ 8فروری کے احتجاج کیلئے کسی منتخب ممبر کو بندے لانے کا ٹارگٹ نہیں دوں گا، آئندہ پارٹی کے لانگ مارچ میں یہ فرق ہوگا کہ پہلے قیادت اداروں کے ساتھ رابطے میں تھی، اس بار اگر لانگ مارچ کیلئے نکلے تو کسی سے کوئی بات نہیں ہوگی،
اگر میں گرفتار ہوا تو شاہراہ ریشم، پاک افغان شاہراہ، موٹروے اور جی ٹی روڈ مکمل بند کریں گے۔ انہوں نے کہا کہ 9مئی کے بعد جس طرح ہمار ے ورکرز کو رلایا گیا یہ بات کبھی نہیں بھولوں گا، جب بھی اختیار ملا ان سب کو نشان عبرت بنائونگا، یہ میرا وعدہ ہے۔ انہوں نے کہا کہ شہباز شریف یاد رکھیں کل ہماری حکومت آئی تو آپ کے بچے بھی روئیں گے،اگر ہماری حکومت میں شہباز شریف کے بچے نہ روئیں تو پی ٹی آئی چھوڑ دوں گا۔
