نادرا نے اپنی خدمات عوام کے گھروں کے قریب لانے کیلئے نیا متبادل سروس چینل متعارف کرا دیا ہے اور ای سہولت فرنچائزز پر شناختی خدمات کی فراہمی کا پائلٹ منصوبہ شروع کردیا ہے جس سے گمشدہ شناختی کارڈ کا ری پرنٹ اور تجدید اب منتخب ای سہولت فرنچائزز سے ممکن ہوسکے گی۔
ترجمان نادرا کے مطابق پائلٹ منصوبے کا آغاز اسلام آباد، راولپنڈی، لاہور اور کراچی سے کر دیا گیا ہے، ابتدائی مرحلے میں 18 ای سہولت فرنچائزز پر نادرا خدمات دستیاب ہیں اورہر ای سہولت فرنچائز پر نادرا کا نامزد افسر موجود ہو گا۔
انہوں نے کہا کہ نادرا کی مقررہ فیس پر ای سہولت سروس چارجز 100 روپے اضافی وصول کئے جائینگے، ای سہولت نیٹ ورک میں ملک بھر میں 22 ہزار سے زائد فرنچائزز موجود ہیں۔
ترجمان کے مطابق 9,500 سے زائد ای سہولت فرنچائزز پر بایو میٹرک سہولیات دستیاب ہیں، ناخواندہ شہریوں اور سمارٹ فون نہ رکھنے والوں کیلئے سہولت موجود ہے۔
انہوں نے مزید کہاکہ اس سے نادرا مراکز پر رش اور شہریوں کے سفری مسائل میں کمی آئیگی، پائلٹ منصوبے کی کامیابی کے بعد سہولت ملک بھر میں فراہم کی جائیگی، ای سہولت فرنچائزز کی فہرست نادرا ویب سائٹ اور سوشل میڈیا پر دستیاب ہے۔
