پاکستان اور امریکہ نے دوطرفہ سیکیورٹی تعاون، بارڈر مینجمنٹ اشتراک بڑھانے پر اتفاق کیا ہے جبکہ وزیر داخلہ محسن نقوی نے امریکی اداروں کیساتھ تعاون مزید مضبوط کرنے کا عزم کرتے ہوئے کہا ہے کہ این سی سی آئی اے ملک بھر میں غیر قانونی کال سینٹرز کیخلاف کارروائی کر رہی ہے، ایف آئی اے کے انسداد دہشت گردی ونگ کو فعال کرنے میں امریکی معاونت فائدہ مند ثابت ہوگی۔
ہفتے کو وفاقی وزیر داخلہ محسن نقوی سے امریکی سفیر نیٹلی بیکر کی سربراہی میں اعلی سطحی وفد نے ملاقات کی۔
اس موقع پر وزیر مملکت داخلہ طلال چودھری، وفاقی سیکرٹری داخلہ، ڈی جی ایف آئی اے، کمانڈنٹ فیڈرل کانسٹیبلری، ایڈیشنل سیکرٹری داخلہ، ڈی جی نیشنل سائبر کرائمز انوسٹی گیشن ایجنسی، ڈی جی پاسپورٹ اینڈ امیگریشن، آئی جی اسلام آباد پولیس اور دیگر اعلی حکام بھی موجود تھے۔
ملاقات میں پاک امریکہ تعلقات اور مشترکہ مفادات کے شعبوں میں تعاون بڑھانے پر تفصیلی تبادلہ خیال کیا گیا۔
فریقین نے دوطرفہ سیکیورٹی تعاون، بارڈر مینجمنٹ ضمن میں اشتراک بڑھانے، کوسٹل گارڈز و دیگر اداروں کو جدید امریکی آلات سے لیس کرنے پر اتفاق کیا۔
وزیر داخلہ نے کہا کہ امریکی اداروں اینٹی ٹیررسٹ اسسٹنٹس پروگرام اور بیورو آف انٹرنیشنل نارکوٹکس اینڈ لا انفورسمنٹ کیساتھ جاری تعاون مزید مضبوط کیا جائے گا، ہر سطح پر پاک امریکہ تعاون کیلئے کوآرڈنیشن بہتر بنائی جائے گی۔
محسن نقوی نے کہا کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائیگی ،ایف آئی اے، ایف سی اور سائبر کرائم ایجنسی کے افسران کیلئے ٹریننگ پروگرامز بھی جاری رکھے جائینگے۔
وزیر داخلہ نے کہا کہ ایف آئی اے کے انسداد دہشت گردی ونگ کو فعال کرنے کیلئے امریکی معاونت فائدہ مند ثابت ہوگی، یہ وفاقی سطح پر پہلا اینٹی ٹیررسٹ ونگ ہوگا جو صوبوں کیساتھ موثر کوآرڈنیشن رکھے گا۔
انہوں نے این سی سی آئی اے ملک بھر میں غیر قانونی کال سینٹرز کیخلاف بھرپور کارروائی کر رہی ہے، مالیاتی فراڈ اور دہشت گردی فنڈنگ روکنے کیلئے جدید سافٹ ویئر کی ضرورت ہے جس میں امریکہ کا اشتراک اہم ہے۔
اس موقع پر امریکی وفد نے سیکیورٹی تعاون اور دوطرفہ روابط بڑھانے کیلئے پاکستان کی کاوشوں کو سراہا اور وزارت داخلہ اور امریکی اداروں کے درمیان جاری تعاون کی تعریف کی۔
